२१ असार २०७६, इटहरी
झापामा मोटरसाइकल चोरी हुने घटना बढेपछि झापा प्रहरीले सुरु गरेको गिरोह पक्राउ गर्न विशेष अभियानबाट यही महिनाभित्रै चोरीका १९ वटा मोटरसाइकल सहित १३ जनालाई पक्राउ गरेको छ ।
पक्राउ परेका १३ जनालाई इलाका प्रहरी कार्यालय बिर्तामोडमा आज पत्रकार सम्मेलन मार्फत सार्वजनिक गरिएको हो । पक्राउ पर्नेहरूमा झापा गौरादहका विजय चौधरी, रोबिन राजवंशी, बाह्दशीका विनोद मुर्मु, करण चौधरी, कमल गाउँपालिकाका केशव श्रेष्ठ, शिवसताक्षीका किरण भण्डारी रहेका छन् । यस्तै इलाम चुलाचुलीका सन्त श्रेष्ठ, शिवसताक्षी ५ का रमेश ताजपुरीया, प्रेमबहादुर रिमाल, गौरादहका सन्त लिम्बु, प्रकाश न्यौपाने, दमकका बसन राई र कमल गाउँपालिकाका रामु दमाई रहेको प्रहरी कार्यालय झापाका प्रहरी उपरीक्षक दिनेशकुमार मैनालीले जानकारी दिए ।
उनीहरूलाई प्रहरीले चोरीको १९ वटा मोटरसाइकल सहित पक्राउ गरेको हो । बरामद गरिएको अधिकांश मोटरसाइकल बजाज कम्पनीको २२० सिसीको पल्सर रहेको जनाइएको छ ।
