२४ कार्तिक २०७६, काठमाडौं
आज प्रकाशित राष्ट्रिय दैनिकले खेलकुदको अस्तव्यतता, बजार लक्षित शिक्षा, हिमाली क्षेत्रमा राज्यविहीनता, बालहिंसा, अकुपाई टुँडिखेल अभियानको सन्देश, सांसदहरुको उदासीनता, संस्थागत बन्न नसकेको महासंघजस्ता विषयलाई सम्पादकीय बनाएका छन् ।
नयाँ पत्रिकाले आगामी मंसिर १५ मा हुन गइरहेको १३औं दक्षिण एसियाली खेलकुद प्रतियोगिताको तयारीका विषयमा विषयमा सम्पादकीय लेखेको छ । ‘खेलकुदको अस्तव्यस्तता’ शीर्षकमा लेखिएको सम्पादकीयमा भनिएको छ–तीन पटक म्याद थपेर नयाँ मिति तय गरिएको समयमा पनि साग आयोजनाका लागि पूर्वाधार तयार नहुनु राष्ट्रिय लज्जाको विषयमा हो ।
नेपालको औपचारिक शिक्षालाई समयानुकूल, व्यावहारिक, उत्पादनमुखी तथा प्रतिस्पर्धी बनाउने प्रयासस्वरुप सरकारले नयाँ शिक्षा नीति लागू गरेको उल्लेख गर्दै गोरखापत्रले ‘सभ्यता र बजारलक्षित शिक्षा’ शीर्षकमा सम्पादकीय लेखेको छ । सम्पादकीयमा वर्तमान नीतिलाई परम्पराको निरन्तरताभन्दा पनि वर्तमान आवश्यकता पूरा गर्ने औजारका बनाइनुपर्नेमा जोड दिएको छ ।
यता नेपाल समाचारपत्रले ‘हिमाली क्षेत्रमा राज्यविहीनता’ शीर्षकमा सम्पादकीय लेख्दै विश्वको सर्वोच्च सगरमाथाको आधार शिविर र माथिल्लो खुम्बु क्षेत्रमा पुगेका स्वदेशी तथा विदेशी पर्यटकले सरकारको स्वीकृतिबिना नै ‘ड्रोन’ प्रयोग गर्ने गरेको उल्लेख गरेको छ । समाचारपत्रले ड्रोनको अवैध प्रयोगलाई नियन्त्रण गर्न ट्राभल एजेन्सी, सरकारी कर्मचारी र सुरक्षा निकायको समन्वय हुनुपर्नेमा जोड दिएको छ ।
अनाथ र असाय बालबालिकालाई उचित पालनपोषण र शिक्षादीक्षा दिन भनी खुलेका बालगृहबाटै पटकपटक बालबालिका उद्धार गर्नुपर्ने अवस्था आउनु लज्जास्पद भएको उल्लेख गर्दै आजको कान्तिपुरले ‘बालहितका नाममा हिंसा’ शीर्षकमा सम्पादकीय लेखेको छ । काठमाडौं उपत्यकाका ६ वटा बालगृहबाट १९१ जनाको उद्धार गर्नुपर्ने अवस्था भयावह भएको भन्दै सम्पादकीयमा भनिएको छ –बालबालिकालाई बालगृहमा राख्नैपरे पनि स्थानीयतहबाट सिफारिस ल्याउनुपर्ने नियमको कडाईका साथ पालना गराइनुपर्छ । परोपकारको नाममा कसैलाई हिंसा गर्ने छुट कसैले पनि पाउनु हुँदैन ।
त्यसैगरी नागरिक दैनिकले टुँडिखेल अतिक्रमणको चपेटामा पर्दै गएपछि यसलाई बचाउन सम्पदा अभियन्ताहरुले पहलमा नागरिक स्तरबाट ‘अकुपाई टुँडिखेल’ आभियानको विषयमा सम्पदकीय लेखेको छ । ‘अकुपाई टुँडिखेल अभियानको सन्देश’ शीर्षकमा लेखिएको सम्पादकीयमा भनिएको छ –टुँडिखेललाई पुरानै अवस्थामा जोगाएर खुला क्षेत्र राख्नुपर्ने पक्षमा ठूलो संख्यामा सर्वसाधारण रहेका छन् । …यो अभियान अभियान्ताको मात्र होइन, काठमाडौँवासीको अभिमत हो ।
यता जनप्रतिनिधिहरु अझै पनि जनताका काममा नफर्किको भन्दै अन्नपूर्ण पोस्ट्ले ‘सांसदहरुको उदासीनता’ शीर्षकमा संसद्लाई प्रभावकारी र जीवनन्त बनाउने जिम्मेवारी सम्हालेका सांसदको जनताका काममा ध्यान जानुपर्नेमा जोड दिइएको छ । सम्पादकीयमा भनिएको छ –सांसदहरु मुख्य काम छाडेर सरुवा र बढुवाका फाइल बोक्दै मन्त्रालयहरुमा धर्ना दिने, ससाना योजनामा पनि कसिसन खोज्ने र चार करोड बजेट विनियोजनमा मात्र सीमित हुनेजस्ता कार्यकार्यले संसद्प्रति अविश्वास बढ्दै जान्छ ।
त्यसैगरी आर्थिक क्षेत्रमा केन्द्रित भएर प्रशाशित हुने दैनिक पत्रिकाले पुँजीबजार र निजी क्षेत्रको छाता संस्था उद्योग वाणिज्य महासंघमा देखिएको विवादका विषयलाई आफ्नो सम्पादकीयमा समेटेका छन् ।
आज प्रकाशित कारोबार दैनिकले ‘पुँजीबजारको सुस्त आधुनिकीकरण’ शीर्षकमा सेयर बजारलाई आधुनिकीकरणमा गर्नका लागि चालिएका कदमहरु कमजोर भएको भन्दा पनि प्रणालीगत सुधार एवं नीतिगत सुधारमा ध्यान नगएको उल्लेख गरेको छ ।
आर्थिक अभियानले नेपाल उद्योग वाणिज्य महासंघ संस्थागत रुपमा नचलेको र कुनै पनि व्यक्ति वा समूहको लहडमा चलेको देखिएको भन्दै ‘संस्थागत बन्न नसकेको महासंघ’ शीर्षकमा सम्पादकीय लेखेको छ । सम्पादकीयमा भनिएको छ –निजी क्षेत्रको आफ्ना मागहरुप्रति सरकार संवेदनशील हुन नसकेको, कर आतंकको मारमा परेको बताइरहँदा बलियो र चलायमान महासंघ अहिलेको आवश्यकता हो ।