०७ जेठ २०७६, इटहरी
मोरङको सुनवर्षी नगरपालिकाभित्र रहेका महिलाहरूलाई विभिन्न सीपमूलक तालिम दिएर आत्मनिर्भर बनाउन ‘सीप विकास प्रशिक्षण तथा विक्री केन्द्र’ संचालनमा आएको छ । सीप विकास केन्द्र संचालनमा आएपछि स्थानीय खुशी भएका छन् ।
सुनबर्सी नगरपालिकाका मेयर कालीप्रसाद दासले सोमबार एक कार्यक्रमको बिच उक्त केन्द्रको उद्घाटन गरेका हुन् । ‘महिलाहरु आर्थिक रुपमा सक्षम नहुँदा समाजमा पछि परेकाले महिलाहरुलाई स्वरोजगार बनाउन कार्यक्रम संचालनमा नगरपालिको भनाई छ ।
सीप विकास प्रशिक्षण केन्द्रमा महिला तथा पुरूषका लागि विभिन्न सीपमूलक तालिम ल्याएको मेयर दासले बताए । मेयर दासले सीप विकास प्रशिक्षण केन्द्रमा पहिलो चरणमा ४० जनाभन्दा बढी महिलाहरूलाई सिलाईकटाई सम्बन्धी तालिम दिने बताए । सीपमूलक तालिम संचालन गर्न नगरपालिकाले २२ वटा सिलाईकटाई मिसिन पनि खरिद गरेर ल्याएको छ । तालिममा पिछडा वर्ग, आदीवासी जनजाति, दलित समुदायका महिलाहरूलाई समेट्ने नगरपालिकाले जनाएको छ । नगरपालिकाभित्र रहेका महिला तथा पुरूषहरूका लागि सीप विकास प्रशिक्षण केन्द्रमा वाइरिङ्ग, ब्यूटिपार्लर, अगरवत्ती, मैनवत्ती बनाउने लगायतको विभिन्न सीपमूलक तालिम दिने बताईएको छ । नगरपालिकाले सीपमूलक तालिम दिएर आत्मनिर्भर बनाउन ५० लाख रुपैयाँ नगर परिषद् बैठकबाट बजेट छुटयाएको नगरपालिकाको मेयर दासले जानकारी दिए । महिलाको जनचेतना अभिवृद्धिसँगै सीपमूलक तालिम दिएर क्षमता प्रदान गर्दै व्यवसायिक रूपमा आय आर्जनको काममा लगाउने योजना रहेको पनि दासको भनाइ छ ।
महिलालाई समग्र रूपमा आत्मनिर्भर बनाउन जनचेतना अभिवृद्धि, क्षमता अभिवृद्धि, सीपमूलक तालिम लगायत आय आर्जन सम्बन्धी कार्यक्रमलाई प्राथमिकतामा राखेको नगरपालिकाले जनाएको छ । सीप सिकेपछि उनीहरूलाई व्यवसाय संचालन गर्न नगरपालिकाले प्रेरित गर्ने र लामो अवधिको तालिम दिएपछि अनुदान उपलब्ध गराएर प्रत्यक्ष रूपमा आयआर्जन हुने व्यवसाय सञ्चालन गराउने र त्यसमा अन्य महिलाहरूलाई रोजगारी उपलब्ध गराउने योजना रहेको नगरपालिकाले जनाएको छ ।
