सुशासन र भ्रष्टाचारमुक्त देश बनाउन माग

३० कार्तिक २०७५, काठमाडौँ

जनअधिकार अभियान नेपालले मानवअधिकारसहितको सुशासन र भ्रष्टाचारमुक्त देश निर्माणका लागि सरकारलाई आग्रह गरेको छ ।

‘वर्तमान राजनीतिक व्यवस्था र मानवअधिकार’ विषयको अन्तक्र्रियामा मानवअधिकारकर्मी, कानूनविद्लगायत नागरिक समाजका अगुवाले सो माग राखेका हुन् । जनअधिकार अभियान नेपालका अध्यक्ष वरिष्ठ अधिवक्ता एकराज भण्डारीले लोकतन्त्रको स्थापनापछि देशमा भ्रष्टचारले व्यापकता पाएको र जनताको पैसाको दुरुपयोग भएको बताउनुभयो । “लोकतन्त्रपछिको चुनावले जनतामा आशा त देखाइदिए तर यसले जनताको अधिकारलाई प्रत्याभूत गराउन सकेन”, उहाँले भन्नुभयो ।

नागरिक समाजका डा सुन्दरमणि दीक्षितले देशमा नयाँ शासक परिवर्तन भए पनि व्यक्तिवादी चिन्तन हावी भएको बताउँदै देशका लागि सोच्ने नेतृत्वको आवश्यकता औँल्याउनुभयो ।