थप अध्ययनका लागि कोरोनाबाट मृत्यु भएकी महिलाको गाउँ बाह्रबिसे चिकित्सक टोली जाँदै

०४ जेष्ठ २०७७, काठमाडौं

सिन्धुपाल्चोकको बाह्रबिसे नगरपालिका–९ राम्चेकी २९ वर्षीया महिलाको कोभिड–१९ बाट मृत्यु भएपछि अनुसन्धानका लागि चिकित्सकको टोली त्यसतर्फ जाने भएको छ ।

कोरोना भाइरसको संक्रमणबाट नेपालमा पहिलोपटक एक महिलाको मृत्यु भएपछि त्यसको अनुसन्धान गर्न विज्ञ चिकित्सकसहितको टोली पठाउन लागिएको हो ।

टोलीले मृतक महिलाको घर, माईती गाउँ र आसपास क्षेत्रमा उनको सम्पर्कमा आएका व्यक्तिहरूका बारेमा अध्ययन गरेर रिपोर्ट तयार गर्ने स्वास्थ्य मन्त्रालयका एक अधिकारीले बताए ।

बाह्रबिसे नगरपालिकाका मेयर निमपुञ्जो शेर्पाले मन्त्रालय र बागमती प्रदेश सरकारबाट अध्ययन अनुसन्धानको लागि स्वास्थ्यकर्मीहरूको टोली आउन लागेको जानकारी दिए ।

सिन्धुपाल्चोक राम्चेकी २९ वर्षीया महिलाको कोरोना संक्रमणबाट शनिबार धुलिखेल अस्पतालमा मृत्यु भएको थियो ।

|सांकेतिक तस्वीर|