०१ बैशाख २०७७, काठमाडौं
कोभिड १९ (कोरोना भाइरस) संक्रमित महिलासँगै एउटै बसमा कैलाली पुगेका अन्य १६ जनालाई पुनः क्वारेन्टाइनमै ल्याइँदै छ ।
वीरगञ्जबाट ती महिलासँगै अन्य १६ जना सहितको समूह एउटै बसमा कैलाली पुगेको थियो । उक्त बसमा वीरगञ्जबाट ३५ जना चढे पनि लम्की–चुहामा भने १७ जना झरेको कैलालीका प्रहरी प्रमुख एसपी सुदीप गिरीले बताए ।
अरु व्यक्तिहरु पश्चिमका विभिन्न ठाउँका रहेका प्रहरीले जनाएको छ । उनीहरुलाई पनि आफ्नै ठाउँको क्वारेन्टाइनमा राख्नेगरी वीरगञ्जबाट बसमा पठाइएको थियो । लम्कीचुहामा झरेका १७ जनालाई भने १८ गतेदेखि लम्की बहुमुखी क्याम्पसको क्वारेन्टाइनमा राखिएको थियो ।
तर र्यापिड परीक्षणमा ‘नेगेटिभ’ रिपोर्ट आएपछि उनीहरुलाई गत २८ चैत्रमा घर पठाइएको थियो । संक्रमण भएकी महिलाको परिवारका अन्य तीन सदस्य पनि त्यही बसमा लम्कीचुहा पुगेका थिए ।
अहिले १६ जनालाई पुनः क्वारेन्टाइनमा फर्काउने काम भइरहेको एसपी गिरीको भनाइ छ । संक्रमित महिलालाई भने सेती प्रादेशिक अस्पताल लगिएको छ । उनीसँगै नेपालमा कोरोना संक्रमितको संख्या १३ पुगेको छ ।
|फाइल तस्वीर|
