२० चैत्र २०७६, काठमाडौं
शुक्रराज ट्रपिकल तथा सरुवा रोग अस्पताल टेकुमा उपचाररत कोभिड १९ (कोरोना भाइरस) संक्रमित दुई जनाको दोस्रो रिपोर्ट पनि पोजेटिभ आएको छ ।
यससँगै उनीहरुको अस्पताल बसाइ लम्बिने भएको छ । नेपालका दोस्रो र तेस्रो कोरोना संक्रमित बिरामीको गत मंगलबार थ्रोट स्वाब संकलन गरी परीक्षणका लागि राष्ट्रिय जनस्वास्थ्य प्रयोगशाला पठाइएको थियो ।
दोस्रो रिपोर्ट नेगेटिभ आए उनीहरुलाई डिस्चार्ज गर्ने तयारी थियो । तर बुधबार (हिजो) रिपोर्ट पोजेटिभ आएपछि पुनः स्वाब संकलन गरेर परीक्षण गरिने टेकु अस्पतालले जनाएको छ ।
गत ४ चैतमा फ्रान्सबाट कतार हुँदै आएकी १९ वर्षीय युवतीमा र ६ चैतमा यूएईबाट आएका धादिङका ३४ वर्षीय युवामा कोरोना संक्रमण पुष्टि भएपछि उनीहरु अहिले टेकुमा उपचाररत छन् ।
दुवैका स्वास्थ्य अवस्था सामान्य रहेको बताइएको छ ।
