२२ भदौ २०७६, काठमाडौं
संघीय सरकारका स्वास्थ्य तथा जनसंख्या राज्यमन्त्री डा.सुरेन्द्र यादवले जनकपुरस्थित जानकी वृद्धा आश्रमका वृद्धाहरुको स्वास्थ्य चेकजाँच गरेका छन् ।
शनिबार बिहान व्युटिसियन एसोशिएसन धनुषाले आश्रममा आयोजना गरेको निःशुल्क स्वास्थ्य परीक्षण तथा औषधि वितरण कार्यक्रमलाई उद्घाटन गर्दै राज्यमन्त्री डा. यादवले केही वृद्धाहरुको स्वास्थ्य परीक्षण आफैंले गरेका थिए ।
स्वास्थ्य जाँच गर्दै उनले स्वास्थ्य रहन खानपिन, उठबस तथा अपनाउनुपर्ने संयमताको विषयमा वृद्धाहरुलाई सल्लाह सुझाव दिएका छन् । वृद्धामा बढी दम रोगको शिकायत रहेको राज्यमन्त्री यादवको भनाई छ । उनले आश्रमका वृद्धाहरुको निःशुल्क स्वास्थ्योपचार र औषधिको व्यवस्था गर्ने समेत प्रतिवद्धता व्यक्त गरेका छन् ।
शिविरमा वृद्धाहरुलाई निःशुल्क औषधि समेत प्रदान गरिएको थियो । वृद्धाआश्रममा अहिले १६ जना वृद्धाहरु रहेका छन् । जानकी वृद्धा आश्रममा सन्तान नभएका तथा सन्तानबाट पीडित वृद्धाहरु बस्ने गर्छन् ।
