२७ जेठ २०७६, काठमाडौं
खानेपानी मन्त्री बिना मगरले धादिङ जिल्लाको ज्वालामूखी गाउँपालिकाको चैनपुरमा सम्पन्न भएको चैनपुर खानेपानी आयोजनाको उद्घाटन गरेका छन् ।
सोमबार मन्त्री मगरले धादिङको सदरमुकाम धादिङबेसीबाट १९ किलोमिटर उत्तरमा निर्माण सम्पन्न भएको खानेपानी आयोजनाको उद्घाटन गरेका हुन् । उक्त खानेपानी आयोजना उद्घाटन गर्दै मन्त्री मगरले चैनपुरबासीले घण्टौं हिडेर खानेपानी ल्याउनुपर्ने बाध्यता अन्त्य भएकोमा खुसी व्यक्त गरिन् ।
आयोजनाको उद्घाटन गर्दै मन्त्री मगरले भनिन्, ुहेर्दा सानो देखिए पनि यसले निकै रणनीतिक महत्व बोकेको छ । आयोजना बन्नुपूर्व यहाँका महिलाको प्रत्येक बिहान पानी बोक्न मै बित्थ्यो । अब त्यो परिस्थितिको अन्त्य भएको छ । हामीले शुद्ध पानी मात्र पाएका छैनौं, पानी बोक्नकै लागि श्रम गर्नुपर्ने, बिहानभरिको समय खर्च गर्नुपर्ने बाध्यताको पनि अन्त्य गरेका छौं ।
‘हामी तीन वर्षभित्र सतप्रतिशत नेपालीलाई खानेपानी पुर्याउने लक्ष्यका साथ अघि बढिरहेका छौं । उद्घाटन समारोहलाई सम्बोधन गर्दै मन्त्री मगरले भनिन्, ‘खानेपानीको व्यवस्थापन गर्नुपर्ने जिम्मेवारी मूख्यत महिलाकै काँधमा हुन्छ । पानी बोक्न समय खर्चिदा महिलाहरुले अरु काममा समय दिन सक्नुभएको छैन । यो बाध्यताको अन्त्य गरेर मात्र समृद्ध नेपाल बनाउन सकिन्छ, हामी तीन वर्षभित्र सतप्रतिशत नेपालीलाई शुद्ध खानेपानी र्पुयाउने लक्ष्यका साथ अघि बढिरहेका छौं ।’
‘महिला सबल भए, महिला आत्मनिर्भर भए मात्र समाज र देश समृद्ध बन्छ । महिलाहरु घरायसी काममा मात्र अल्झिदा अन्य उत्पादनमूलक काममा समय दिन भ्याएका छैनन्, यो बाध्यता मैले राम्रोसँग बुझेको छु । तपाईहरुको समस्यालाई आफ्नै समस्या ठानेर काम गरिरहेको छु र गर्नेछुु मन्त्री मगरले थपिन, ‘संविधानले खानेपानीलाई मौलिक हकको रुपमा व्यवस्था गरेको छ । त्यसको कार्यान्वयनका लागि मन्त्रालय गम्भीर रुपमा लागिरहेको छ ।’
विश्व बैंक र ग्रामीण खानेपानी तथा सरसफाइ कोष विकास समिति (फण्ड बोर्ड) को आर्थिक सहयोगमा संचालित उक्त आयोजना सम्पन्न भएपछि करिब १ हजार जनसंख्या लाभान्वित हुने भएका छन् ।
यस आयोजनामा ४ वटा इन्टेक, ६ वटा ट्याङ्की, ४ ठाउँमा पम्प हाउस र २ ठाउँमा पानी वितरण केन्द्र छन् । यस आयोजना अन्तर्गत १ सय ६१ घरमा मिटर सहितको धारा जडान गरिएको छ ।
फोकस नेपालको प्राविधिक सहयोगमा सम्पन्न भएको यो आयोजना वि.सं. २०७१ बाट प्रारम्भ भएको हो । १ करोड ३४ लाख ४२ हजार छत्तीस रुपैयाँको लागतमा सम्पन्न उक्त आयोजनाबाट चैनपुरका १६१ घरधुरी लाभान्वित भएका छन् ।
आयोजनामा ४ वटा इन्टेक, १२८ घनमिटरका दरले ६ वटा ट्याङ्की, ४ वटा पम्प हाउस र २ वटा पानी बितरण केन्द्र रहेका छन् । आयोजनाले उत्तरी धादिङका हजारौं नागरिक लाभान्वित भएको उपभोक्ता समितिका अध्यक्ष चन्द्रप्रसाद छत्खुलीले बताए ।
कार्यक्रममा धादिङका सङ्घीय सांसदहरु गुरु बुर्लाकोटी, खेमप्रसाद लोहनी, विश्व बैंकका नेपाल प्रबन्धक फारिस हदाद जेरबोस, फण्ड बोर्डका कार्यकारी निर्देशक लिलाप्रसाद ढकाल लगायतले सम्बोधन गरेका थिए ।
