२० बैशाख २०७६, काठमाडौं
काठमाडौं महानगरपालिकाले शुल्क वृद्धि फिर्ता गर्ने निर्णय गरे पनि महानगर भित्रका विद्यालयहरुले चासो दिएका छैनन् ।
गत फागुनमा ६० प्रतिशत गरिएको शुल्क वृद्धि १२ बैशाखमा मेयर विद्यासुन्दर शाक्यको अध्यक्षतामा बसेको शिक्षा समिति बैठकले फिर्ता लिने निर्णय गरेको थियो ।
शुल्क वृद्धिको चर्को विरोधपछि महानगरपालिकाले शिक्षा ऐन र विद्यालय व्यवस्थापन नियमावली –२०७४ अनुसार शुल्क निर्धारणको अधिकार नगर कार्यपालिकामा मात्र भएको भन्दै समितिले गरेको निर्णय खारेज गरेको थियो ।
तर महानगरको शिक्षा समितिले यसअघिको आफ्नो निर्णय सच्याउँदासम्म सबै विद्यालयले वृद्धि भएको शुल्क लागू गरिसकेका थिए ।
अहिले विद्यालयहरुले महानगरपालिकाबाट शुल्क वृद्धि फिर्ता पत्र नआएको भन्दै अभिभावक र विद्यार्थीहरुसँग वृद्धि भएकै शुल्क लिईरहेका छन् ।
