प्रहरीको चिकित्सक टोली बारा र पर्सामा

१९ चैत २०७५, काठमाडौं

बारामा आएको हावाहुरीका कारण गम्भीर घाइते भएका थप दुई जनालाई उपचारका लागि सेनाको हेलिकप्टरबाट काठमाडौँस्थित शिक्षण अस्पतालमा ल्याइएको छ । अहिलेसम्म शिक्षण अस्पतालमा नौ जना घाइतेको उपचार भइरहेको छ ।

बारा परवानीपुर गाउँपालिका–८ का १० वर्षीय नुरमोहम्मद अन्सारी र बारा कलैयाका सुनितादेवी ठाकुरलाई थप उपचारका लागि आजै शिक्षण अस्पताल ल्याइएको प्रहरी वरिष्ठ उपरीक्षक उमेशराज जोशीले जानकारी दिनुभयो । उहाँका अनुसार उनीहरुसहित नौ जनाको अहिले शिक्षण अस्पतालमा उपचार भइरहेको छ । यसअघि सेनाको हेलिकप्टरबाट सात जना घाइतेलाई ल्याइएको थियो ।

यसअघि ल्याइएकामा बारा फेटा गाउँपालिकाका ३६ वर्षीय त्रिचन पटेल, ५९ वर्षीय मोबारक महमद मियाँ, ५० वर्षीय सुरेश पटेल, तीन वर्षीय अमन पटेल, ३५ वर्षीया गीतादेवी पटेल, ३३ वर्षीय मुना अन्सारी र नौ वर्षीय सलिना खातुन थिए । प्रहरीका अनुसार सो घटनामा अहिलेसम्म २७ जनाले ज्यान गुमाएका छन् भने ६०० भन्दा बढी घाइते छन् । धेरै घाइते उपचारपछि घर फर्किसकेका छन् ।