२५ वैशाख २०७५, सुर्खेत
वैशाख १३ देखि २४ गतेसम्म सञ्चालित प्रादेशिकस्तरको कृषि, पर्यटन तथा औद्योगिक व्यापार महोत्सव सम्पन्न भएको छ ।
उद्योग वाणिज्य संघ जुम्लाको आयोजनमा सञ्चालित महोत्सव समापन समारोहलाई सम्बोधन गर्दै प्रदेशसभा सदस्य पदमबहादुर रोकायाले महोत्सवले कृषि, जल, जडीबुटी, पर्यटकीय सम्भावना, पुरातात्विक तथा ऐतिहासिक खस सभ्यता र भाषाशैलीको पहिचान दिन सफल भएको बताउनुभयो । महोत्सव ‘कर्णाली–रारा पर्यटन वर्ष २०७५’ सफल पार्ने आधार बनेको उहाँको भनाइ थियो ।
“महोत्सवबाट कर्णालीको धार्मिक, सांस्कृतिक र प्राकृतिक पर्यटनका साथै स्थानीय उत्पादनको प्रबर्द्धनमा सहयोग पुगेको छ,” उहाँले भन्नुभयो ।
पूर्व पशुपंक्षी राज्यमन्त्री गोमा कुँवरले भावी दिनमा जुम्लालाई पर्यटकीय गन्तव्यका रुपमा रुपमा स्थापित गरिनुपर्ने बताउनुभयो ।
महोत्सव आयोजक समितिका संयोजक तथा उद्योग वाणिज्य संघ जुम्लाका अध्यक्ष रामदत्त रावलले महोत्सवले यहाँको खस सभ्यता, पहिरन, खाना परिकार, पर्यटकीय सम्भावना प्रवद्र्धनमा अधिकतम सहयोग पुगेको बताउनुभयो । एक लाख नागरिकले महोत्सवको अवलोकन गर्नाका साथै रु एक करोड ६० लाख कारोवार भएको उहाँले जानकारी दिनुभयो ।
