काठमाडौँ । मुन्धुम संस्कृतिविद् तथा याक्थुङ–लिम्बू भाषा–साहित्यका प्रमुख धरोहर तिलविक्रम नेम्वाङ ‘बैरागी काइँला’लाई काठमाडौँमा आयोजित विशेष समारोहमा सम्मानित गरिएको छ।
आबाल ब्रह्मचारी षडानन्द प्रतिष्ठानद्वारा आयोजित आबाल ब्रह्मचारी षडानन्दको १५१ औँ जन्मजयन्ती, १८ औँ वार्षिकोत्सव तथा पुरस्कार वितरण समारोहमा काइँलालाई षडानन्द राष्ट्रिय पुरस्कार प्रदान गरिएको हो। पुरस्कारमा रु एक लाख, दोसल्ला र सम्मानपत्र समावेश थियो।
यसै अवसरमा षडानन्द क्षेत्रीय पुरस्कार नेवारी भाषा, संस्कृति तथा साहित्यका अध्येता सहप्राध्यापक काशीनाथ तमोटलाई प्रदान गरियो। उनी रु ५१ हजार, दोसल्ला र सम्मानपत्रबाट सम्मानित भए।
योग तथा तन्त्रविद् प्रा. विद्यानाथ उपाध्याय भट्टले सम्मानपत्र प्रदान गर्दै काइँला तथा तमोट दुवैलाई भाषा–संस्कृतिका “प्रकाशस्तम्भ” भन्दै प्रशंसा गरे। उनका अनुसार नेवारी भाषिक संरचना र संस्कृतिको अध्ययनमा तमोटको योगदान महत्त्वपूर्ण रहँदै आएको छ।
सम्मान ग्रहण गरेपछि काइँलाले लिम्बू भाषा, लोक साहित्य र मुन्धुम संस्कृतिको संरक्षण तथा प्रवर्द्धनका लागि समर्पित जीवनयात्रालाई सम्मानित गरिएकोमा खुशी व्यक्त गरे। उनका कृतिहरूले पूर्वी नेपालको सांस्कृतिक इतिहास र याक्थुङ समुदायको पहिचान अन्तरराष्ट्रीय स्तरमा चिनाउन मद्दत गरेको मानिन्छ।
प्रतिष्ठानका अध्यक्ष प्रा. चेतोनाथ गौतमले भाषा, साहित्य, शिक्षा तथा संस्कृति क्षेत्रका योगदानकर्ताको पहिचान, दस्तावेजीकरण र सम्मान गर्ने कार्य आगामी वर्षहरूमा अझ विस्तार गरिने बताए।
समारोहमा षडानन्द सिताराम गुठीको अध्ययन प्रतिवेदन सार्वजनिक गर्नुका साथै दाता महानुभावहरूलाई पनि सम्मान गरिएको थियो। कार्यक्रम साहित्य, संस्कृति, शिक्षा र अनुसन्धानमा सक्रिय व्यक्तिहरूको उल्लेख्य उपस्थितिसहित सम्पन्न भएको थियो।
