२३ वैशाख २०७७, काठमाडौं
कोभिड १९ (कोरोना भाइरस)फैलिन नदिन संघीय सरकारद्वारा निर्देशित बन्दाबन्दी (लकडाउन्)को पछिल्लो पटक थपिएको अवधि सकिने दिन नजिकिँदै गर्दा संक्रमितको संख्या बढेको बढ्यै छ ।
यो समाचार तयार पार्दासम्म नेपालमा संक्रमितको संख्या आजसम्म ८२ भनेर आधिकारिक जानकारी स्वास्थ्य तथा जनसंख्या मन्त्रालयले दिएको छ । त्यसमा धेरै पुरुष रहेका छन् ।
मंगलबार (आज) मात्र बाँकेको नेपालगञ्ज उपमहानगरपालिका ८ का ७ जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार आज संक्रमण पुष्टि भएकाहरूमा तीन महिला, तीन पुरुष र एक बालिका छन् ।
भेरी अस्पतालको प्रयोगशालालामा परीक्षण गर्दा उनीहरूमा कोरोना संक्रमण पुष्टि भएको हो । यसअघि गत २१ वैशाखमा एकैदिन त्यहाँ १५ जनामा पनि कोरोना संक्रमण पुष्टि भएको थियो । त्यसअघि नै नेपालगंजमा एकजना भेटिएका थिए ।
अब नेपालगञ्जमा मात्र २३ जना कोरोना भाइरसका बिरामी फेला परिसके । महाशाखाका अनुसार सबैभन्दा बढी प्रदेश नं. १ मा ३१ जना संक्रमित भेटिएका छन् । त्यसमा भोजपुरमा एक, झापामा दुई र उदयपुरमा २८ जना संक्रमित फेला परेका हुन् ।
प्रदेश नं. ५ मा रुपन्देहीमा एक र नेपालगञ्जमा २३ समेत २४ जना संक्रमित देखिएका छन् । प्रदेश नं. २ मा १३ जनामा पोजिटिभ देखिएको छ । जसमा पर्सामा सात, बारामा दुई, रौतहटमा तीन र सर्लाहीमा एकजना छन् ।
सात जना संक्रमित फेला परेको बागमती प्रदेशमा चितवनमा दुई र काठमाडौंमा पाँचजना संक्रमित पाइएको महाशाखाले जनाएको छ । यस्तै कञ्चनपुरमा एक र कैलालीमा चार गरी सुदूरपश्चिम प्रदेशमा पाँचजना संक्रमित फेला परेका छन् ।
त्यस्तै गण्डकी प्रदेशमा बागलुङमा दुईजनामा पुष्टि भएको छ । सात प्रदेशमध्ये कर्णाली प्रदेशमा मात्र अहिलेसम्म संक्रमित भेटिएका छैनन् । अहिलेसम्म १६ जना निको भएर घर फर्किएका छन् ।