‘जदौ’ मा मुख्य अभिनेत्रीको रूपमा नीति शाह अनुबन्धित

काठमाडौं, असार २२ – अन्तरजातीय प्रेमकथामा आधारित नेपाली चलचित्र ‘जदौ’ मा प्रमुख अभिनेत्रीका रूपमा नीति शाह अनुबन्धित भएकी छन्। शनिबार राजधानीमा आयोजित एक समारोहमा नीति र फिल्मका निर्माताबीच आधिकारिक सम्झौता सम्पन्न भएको हो।

यसअघि नै अभिनेता मुकुन भुसाललाई प्रमुख भूमिकामा अनुबन्ध गरिसकिएको फिल्म ‘जदौ’ लाई काजी लिम्बूले लेखेका हुन्। चलचित्र सिल्भर स्क्रिन इन्टरटेन्मेन्ट र समिश्रण मुभिज एण्ड इन्टरटेन्मेन्ट को संयुक्त ब्यानरमा निर्माण हुँदैछ।

फिल्मका सहनिर्मातामा रामराजा सुवेदी, ओम चेम्जोङ, शान्ता तामाङ र नारायण शास्त्री रहेका छन् भने निर्माण व्यवस्थापन बुद्धि माझीले सम्हाल्नेछन्।

‘जदौ’ को छायांकन आगामी भदौ पहिलो साताबाट सुरु हुनेछ। फिल्मका दृश्यहरू दाङ र प्युठानका विभिन्न स्थानमा खिचिनेछन्।

बाबुल गिरीको संगीत रहेको यस फिल्मका प्युठानतर्फका निर्माण व्यवस्थापक लछुमन भण्डारी रहनेछन्।

सिल्भर स्क्रिन इन्टरटेन्मेन्टकी प्रबन्ध निर्देशक बिमला भण्डारीका अनुसार निर्देशकसहित बाँकी कलाकार र प्राविधिक टोलीको विवरण चाँडै सार्वजनिक गरिनेछ।