भर्ना भएका बिरामीलाई पाँच हजार

३१ बैशाख २०७७, काठमाडौं

नागार्जुन नगरपालिकाले बन्दाबन्दी (लकडाउन)को समयमा नगरभित्रका बिरामीलाई आर्थिक सहयोग गरेको छ । कोरोना भाइरस (कोभिड १९)का कारणले उपचार खर्च अभाव नहोस् भनेर ज्येष्ठ नागरिक, अपाङ्गता, एकल महिला र सुत्केरी सबैलाई जनही रु पाँच हजार दिन थालिएको नगरपालिकाका प्रमुख मोहनकुमार बस्नेतले जानकारी दिनुभयो ।

उहाँले अस्पतालमा भर्ना भएका बिरामीलाई रकम उपलब्ध गराएको बताउनुभयो । नगरपालिकाले लकडाउनका बीचमा छ महिनासम्मका सुत्केरी आमा र बच्चालाई समेत जनही रु पाँच हजार उपलब्ध गराउँदै आएको छ । उहाँका अनुसार अस्पतालमा भर्ना भएका र वडा कार्यालयको सिफारिस लिएर आउने बिरामीलाई आर्थिक सहयोग गरिरहेको छ । अहिलेसम्म १० बिरामीले आर्थिक सहयोग लिएका छन् ।

यसैगरी नगरपालिकाबाट सञ्चालित खानेपानीमा दुई महिनाको महसुल छुट गरेको छ । लकडाउनका समयमा कहीँकतै आम्दानीको स्रोत नभएपछि नगरवासीलाई दुई महिनाको खानेपानी महसुल छुट गरिएको प्रमुख बस्नेतले जानकारी दिनुभयो । उहाँका अनुसार चैत र वैशाखको खानेपानी महसुल छुट गरिएको हो । नगरपालिका मातहतका ४० वटा उपभोक्ता समितिबाट खानेपानी वितरण हुँदै आएको छ । ती सबै उपभोक्ताअन्तर्गत नगरवासी महसुल बुझाउनु पर्दैन ।

ती उपभोक्तालाई रु ६०० देखि चार हजारसम्म चैत र वैशाख महिनाको छुट पाउनेछन् । यसैगरी नगरपालिकाले लकडाउनका समयमा पनि विकास निर्माणका कामलाई निरन्तरता दिएको छ । उपप्रमुख सुशीला अधिकारीले लकडाउनका समयमा सडक, विद्युत्को पोल गाड्ने र खानेपानीका काम सञ्चालन रहेको बताउनुभयो । उहाँले कामदारलाई नगरपालिकाले खाद्यान्न उपलब्ध गराएर कामलाई निरन्तरता दिएको बताउनुभयो ।

अहिले प्रत्येक वार्डमा सडक निर्माणको काम भइरहेको छ । नगरपालिकाले सीतापाइला रामकोटा भीमढुङ्गा धादिङ सडकखण्डको ११ किलोमिटर बाटोसमेत बनाइरहेको उपप्रमुख अधिकारीले जानकारी दिनुभयो । उहाँले मङ्गलबारबाट आफू विकास निर्माणका कामको अनुगमनमा पनि निस्केको बताउनुभयो ।

“आर्थिक वर्ष सकिन थालेकाले विकास निर्माणका काम के कति भइरहेका छन् त्यसको अनुगमन गर्न थालेका छौँ”, उहाँले भन्नुभयो, “अति आवश्यक काम हामीले सामाजिक दूरी कायम गरेर सम्पन्न गरिरहेका छौँ ।”