आजको सम्पादकीय : भूमि र छिमेकी, उपनिर्वाचनको रन्को, निर्यात व्यापारको अस्वाभाविक परिदृश्य, सुरुङभित्र श्वास



२२ कार्तिक २०७६, काठमाडौं

आज प्रकाशित विभिन्न राष्ट्रिय दैनिकले नेपालको कालापानी क्षेत्र भारत सरकारले आइतबार प्रकाशित गरेको उसको नयाँ राजनीतिक नक्सामा समेटेको भन्दै कूनीतिक समाधानमा जोड दिएका छन् भने उपनिर्वाचन र श्रम सम्झौता र व्यापार घाटाका विषयमा सम्पादकीय लेखेका छन् ।

नेपालको कालापानी क्षेत्र भारत सरकारले आइतबार प्रकाशित गरेको उसको नयाँ राजनीतिक नक्सामा समेटिएको देखिएपछि उत्पन्न अवस्थाका विषयमा आजको गोरखापत्र दैनिकले ¬‘कूटनीतिक समाधान’ शीर्षकमा आजको सम्पादकीय लेखेको छ । सम्पादकीयमा भनिएको छ –कालापानी र लिपुलेक नेपाली भूमि हुन् यसमा सबै नेपाली स्पष्ट छन् भने भारतीय पक्षले प्राविधिक रुपमा ती क्षेत्रलाई उसको नक्सामा समेटेकाले भारत सच्चिनुपर्छ ।

नागरिक दैनिकले नेपाल राज्यका अभिच्छिन्न भूभाग लिपुलेक, लिम्पियाधुरा र कालापानीलाई भारतले आफ्नो नक्सामा राखेपछि सर्वसाधारण नेपाली उद्वेलित भएको बताएको छ । ‘सीमाबारे संवाद’ शीर्षकको सम्पादकीयमा भनिएको छ–भारतको तुलनामा नेपाल सानो होला तर सार्वभौमसत्ता सानो वा ठूलो हुँदैन । आफ्नो भूभागप्रतिको नेपाली संवेदनशीलतालाई नेपाल सरकारले अवश्य बुझेको छ । भारतलाई त्यसबारे बुझाउने कूटनीतिक पलका लागि नेपाल सरकार तत्पर हुनुपर्छ ।

आजको नयाँ पत्रिका दैनिकले ‘उपनिर्वाचनको रन्को’ शीर्षकमा सम्पादकीय लेख्दै जनमतसंग्रहको रुपमा देखिएको निर्वाचनलाई निष्पक्ष बनाउन विशेष जोड दिएको छ । सम्पादकीयमा ससानो जनमतसंग्रह मानिने उपनिर्वाचनमा आफ्नो पक्षमा परिणाम ल्याउन नसके सरकार कमजोर हुनेछ भने प्रतिपक्षले आफ्नो पक्षमा परिणाम ल्याउन नसके आगामी निर्वाचनमा जनतालाई आकर्षित गर्ने एउटा नारा गुमाउनेछ ।

नेपाल–भारत सम्बन्धको उचाइमा ७१ स्थानमा पहिरो गएको औंल्याउँदै आजको नेपाल समाचारपत्र दैनिकले ‘भूमि र छिमेकी’ शीर्षकमा आजको सम्पादकीय लेखेको छ । सम्पादकीयमा उसले बहुआयामिक सम्बन्ध रहेको भारतसँग गरिने व्यवहार संयम, गम्भीर र प्रमाणिक हुनुपर्नेमा जोड दिँदै भूमी र छिमेकी दुवैको रक्षा गर्नपर्ने बताइएको छ ।

नेपाली कामदारले अरु विदेशीसरह समान हैसियत र सेवासुविधा पाउने गरी नेपाल र संयुक्त अरब इमिरेट्स(युएयी)बीच गत जेठमा सम्पन्न समझदारीको कार्यान्वयनको विषयमा आजको कान्तिपुर दैनिकले सम्पादकीय लेखेको छ । ‘श्रम समझदारी परिपालनका सर्त’ शीर्षकमा लेखिएको सम्पादकीयमा समझदारी कार्यान्वयनका लागि नेपाली पक्षले निरन्तर अग्रसरता देखाउनुपर्छ भनिएको छ ।

त्यस्तै यही साता बझाङमा निर्माणाधीन माथिल्लो कलंगागाड जलविद्युत्को सुरुङ मार्ग छिर्नेक्रममा चार नेपालीको मृत्यु भएको विषयमा आजको अन्नपूर्ण पोष्ट्ले सम्पादकीय लेखेको छ । ‘सुरुङभित्र श्वास’ शीर्षकमा मजदुरलाई उचित क्षतिपूर्ति र ती मजदुरको परिवारको भरणपोषणको पनि जिम्मा प्रवद्र्धक कम्पनीले लिने अवस्थाको सिर्जना गर्न सरकारले भूमिका खेल्नुपर्नेमा जोड दिइएको छ ।

आर्थिक क्षेत्रलाई केन्द्रित गरेर प्रकाशित हुने आर्थिक अभियानले ‘टालटुले सुधार’ शीर्षकमा नेपाल वायु सेवा निवगमले खर्च कटौति गर्ने योजनाको विषयमा सम्पादकीय लेखेको छ । सम्पादीकयमा निगमको व्यवस्थालन चुस्त हुनुपर्नेमा जोड दिँदै पुराना रोगबाट निगम मुक्त हुनुपर्ने उल्लेख गरिएको छ ।

त्यस्तै अर्को आर्थिक क्षेत्रको अर्को दैनिक कारोबारले ‘निर्यात व्यापारको अस्वाभाविक परिदृश्य’ शीषकमा आजको सम्पमादकीय छापेको छ । सम्पादकीयमा भनिएको छ –निर्यात बढेको, आयातमा कमी आएको र व्यापारघाटा सुधारको दिशामा अघि बढिरहँदा पनि अर्थतन्त्र सही बाटोमा छ भन्ने अवस्था भने देखिँदैन ।

प्रतिक्रिया दिनुहोस्