२५ बैशाख २०७६, काठमाडौं
नयाँ वर्ष २०७६ को छेकोमा रिलिज गरिएका चलचित्र ‘ए मेरो हजुर ३’ बाट नेपाली रजपटमा भित्रिएकी नायिका सुहाना थापा आजबाट २० वर्षमा लागेकी छिन् ।
२०५६ वैशाख २५ गते जन्मिएकी नायिका थापालाई उनकी आमा नायिका तथा निर्देशक झरना थापाले समाजिक संजाल फेसबुकमा शुभकामना दिएकी छिन् । उनले गुडियारानी भन्दै छोरी सुहानालाई जन्मदिनको शुभकामना दिएकी हुन् ।
कुनै समय अघिसम्म नेपाली चलचित्र क्षेत्रमा निकै नै व्यस्त तथा चल्तीकी नायिका झरना थापाको छोरीको रुपमा परिचित सुहानाले अहिले आफ्नै नामले चिनिन थालेकी छिन् । भर्खरै रिलिज भएको चलचित्र ‘ए मेरो हजुर ३’ बाट उनले राम्रै दर्शक तथा प्रशंसकहरुको साथ पाएकी छिन् ।
हालै काठमाडौंमा सम्पन्न ११ औं डि सिने अवार्डमा समेत नव नायिकाको अवार्ड हात पर्न सफल भएकी नायिका सुहाना थापालाई नेपाली चलचित्र क्षेत्रमा उदाउँदो नायिकाको रुपमा हेर्न थालिएको छ ।
अमेरिकामा अध्ययनरत छोरी सुहानालाई झरना थापाले आफ्नै निर्देशनमा तयार भैरहेको चलचित्र ‘ए मेरो हजुर ३’बाट डेब्यू गराएकी थिइन् ।
