श्रृङ्खला फर्किइन् नेपाल, भन्छिन् मिस वर्ल्डको ताज नजितेपनि विश्वमा नेपाललाई चिनाए

२७ मङ्सिर २०७५, काठमाडौँ

मिस नेपाल २०१८ को उपाधी चुम्दै मिस वर्ल्डको लागि चीन पुगेकी श्रृङ्खला खतिवडा हिजो मध्यरातमा नेपाल आइपुगेकी छिन् । उनी मिस वर्ल्डमा गएर यतिधेरै सफलता पाउने पहिलो नेपाली चेली हुन् ।

हुन त श्रृङ्खला मिस वर्ल्ड उत्कृष्ट १२ बाट नै आउट भएकी थिइन् तर उनले मिस वर्ल्डका दुई ठूला अवार्ड मल्टिमिडिया अवार्ड र ब्यूटि विथ प्रपोज अवार्ड भने जित्न सफल भइन् । श्रृङ्खला एयरपोर्टमा निकै खुसी र भावुक पनि देखिएकी थिइन् । उनलाई हेर्नको लागि मध्यरातमै भएपनि एयरपोर्टमा मानिसहरुको भिड निकै थियो ।

श्रृङ्खलाले आफूले मिस वर्ल्डको ताज नजितेपनि ३ करोड नेपालीको मन जितेको बताइन् । उनले मिस वर्ल्डमा आफू नेपाललाई विश्वमा चिनाउन गएको र मिस वर्ल्डको ताज नजितेपनि विश्वमा आफूले नेपाललाई चिनाएको महशुस भएको बताइन् । श्रृङ्खलाले मिस वर्ल्डमा गएर दुई ठूला अवार्ड पाउनुमा नै आफू निकै खुसी भएको बताइन् । साथै उनले आफूलाई यतिधेरै माया गर्ने सम्पूर्ण नेपालीलाई धेरै धन्यवाद पनि दिइन् ।