१३ भदौं २०७५, काठमाडौं
बहुपक्षीय प्राविधिक तथा आर्थिक सहयोगका लागि बंगालको खाडी प्रयास (बिमस्टेक)को चौथो सम्मेलनमा सहभागी हुन भुटानका प्रधानन्यायाधीश तथा अन्तरिम सरकारका प्रमुख सल्लाहकार छिरिङ वाङचुक आज काठमाडौं आइपुगेका छन् । विहान ८ बजे भूटान एयरलाइन्स (केबी ४००)को उडानबाट उनी आइपुगेका हुन् । उनलाई उपप्रधानमन्त्री ईश्वर पोखरेलले त्रिभुवन अन्तर्राष्ट्रिय विमानस्थलमा स्वागत गरेका छन् ।
वाङचुक होटल सोल्टी पुगेका छन् । उनलाई कारगेडसहित भीभीआईपी सवारीसाथ होटल लैजाने क्रममा नेपाली सेनाको हेलिकोप्टरले हवाइगस्ती गरेको छ । उनीसँगै भारत र नेपालका लागि भुटानी राजदूत भी नाम्ग्यालसहित भुटानी अधिकारी पनि आएका छन् ।
सम्मेलनमा सहभागी हुन आजै श्रीलंकाका राष्ट्रपति मैथ्रिपाला सिरिसेना अपरान्ह २ :३५ मा एयर इन्डिया (एआई २१५)को उडानबाट आइपुग्दैछन् । उनी लुम्बिनी भ्रमणमा जानेछन् । बाँकी पाहुना भने विहीवार आउँदैछन् ।
बिहीवार विहान ८ः३० बजे भारतीय सेनाको विशेष विहानबाट भारतका प्रधानमन्त्री नरेन्द्र मोदी आउँदैछन् । विहीवारै विहान सवा ९ बजे बीबीसी १८७१ को विशेष उडानबाट बंगलादेशकी प्रधानमन्त्री शेख हसिना तथा सवा १० बजे थाइल्याण्डका राष्ट्रपति जनरल चन ओ चो विशेष विमानबाट काठमाडौं आउँदैछन् । म्यानमारका राष्ट्रपति यु विन मिन्ट मंगलवार अपरान्ह आएका छन् । उनी आज लुम्बिनी जाँदैछन् ।
यो समाचार नयाँ पत्रिका दैनिकबाट साभार गरिएको हो ।
