दिन प्रतिदिन सामाजिक सञ्जालमा भाइरल बन्दै गएका कुल्फिवाला मनकुमारले पाए ३२ बर्षको उमेरमा नागरिकता

०४ भदौ २०७५, काठमाडौँ

नाच्दै गाउँदै अनौठो तरिकाले कुल्फि बेच्ने मन कुमार राई दिनप्रतिदिन सामाजिक सञ्जालमा भाईरल बन्दै गइरहेका छन् । मनकुमार राईले नेपाली भएर पनि आजसम्म नेपाली नागरिकता पाएका थिएनन् । तर हालै भने ३२ बर्षको उमेरमा नेपाली नागरिकता पाएका छन् ।

निकै दुःख कष्ट भोगेका मन कुमार राई आफूले मुटुको समस्या आएपछि नाच्दै गाउँदै कुल्फि बेच्न थालेको बताउँछन् । विगत लामो समयदेखि काठमाडौँमा बस्दै आएका मन कुमार करिब २६ बर्षपछि आफ्नो घर सोलुखुम्बु गएका थिए । यति लामो समयपछि घर जाँदा पनि उनका आफन्त र दाजुभाईले उनलाई सजिलै चिने । मन कुमार यति फेमस भैसकेका छन् कि यहाँमात्र होइन उनको घर सोलुखुम्बुमा पनि उनीसँग फोटो खिच्न चाहनेको भिड लामै थियो ।

मन कुमार राई सबैको लागि एक उदाहरणीय व्यक्ति हुन् । उनलाई हेरेर हामीले जीन्दगीमा अघि बढ्न चाहने हो भने जसरी पनि अघि बढ्न सकिन्छ भन्ने कुरा सिक्न सकिन्छ । दिनमा लगातार ७–८ घण्टासम्म नाच्दै गाउँदै कुल्फि बेच्न सजिलो छैन । तर पनि मन कुमार दिनरात त्यसरी नै कुल्फि बेच्दै हिड्छन् ।

सानैमा आमाबुबा बितेपछि घरको आर्थिक अवस्था कमजोर भएकाले पढ्नको लागि कापी कलम र विद्यालयको नयाँ पोसाक किन्ने सपना बोकेर २०४९ सालमा काठमाडौँ आएका मन कुमार राईले सोचेको जस्तो केहिपनि भएन । उनी सपना त पढ्ने बोकेर आएका थिए तर अचानक मुटुमा समस्या देखिन थालेपछि उनको सबै सपना अधुरै रह्यो । लगातार ३–४ बर्ष औषधी सेवन गर्दापनि र पढ्नुको सट्टा उपचारमा सम्पूर्ण पैसा खर्च गर्दापनि रोग निको नभएपछि निराश बनेका मन कुमार पछि नाच्दै कुल्फि, बदाम बेच्ने काम गर्न थालेपछि विस्तारै केही स्वस्थ हुन थाले ।

जीन्दगीमा निकै मिहिनेत गरेर आज आफू स्वस्थ जीवन जिउन पाउँदा र सबैको नजरमा एक सक्षम युवकको रुपमा चिनिन पाउँदा मन कुमार खुसी छन् । मन कुमारको काम देखेर मानिसहरु यति खुसी भएका छन् कि उनलाई विभिन्न ठाउँहरुबाट आर्थिक सहयोग आईरहेको छ र त्यहि सहयोगको रकमले आफू सोलुखुम्बु गएर नागरिकता बनाएको मन कुमार बताउँछन् । त्यतिमात्र नभएर अब मन कुमार विल्सन विक्रम राईसँग एक विज्ञापनमा पनि सँगै देखिने भएका छन् । आफूलाई आईरहेको सहयोग स्वरुपको रकमलाई आफू सुरक्षित साथ बैंकमा राख्ने मन कुमार बताउँछन् ।

ढिलै भएपनि आफूले नेपाली नागरिकता पाएकोमा मन कुमार निकै खुसी भएको बताउँछन । साथै नेपाली भएकोमा आफूले आफूलाई गर्व महशुस गरेको उनको भनाई छ । यसरी नै सबैको साथ र सहयोग पाए अझ् राम्रो काम गर्दै जाने मन कुमारको सोच रहेको छ ।