काठमाडौं, २८ मंसिर ।
आगामी माघ ९ गतेदेखि प्रदर्शनमा आउने फिल्म **‘बिगुल’**को टिजर आइतबार सार्वजनिक गरिएको छ । सवा एक मिनेट लामो टिजरले फिल्मप्रति दर्शकको चासो थप बढाउने संकेत दिएको छ । यसअघि सार्वजनिक फर्स्टलुक पोस्टरले चर्चा पाइसकेको अवस्थामा आएको टिजरमा देशको वर्तमान राजनीति, राष्ट्रप्रेम, सम्बन्ध र जिम्मेवारीसँगै जेन्जी आन्दोलनको झल्को प्रस्तुत गरिएको छ ।
रमेश कोइरालाको निर्देशनमा बनेको ‘बिगुल’का कथाकार तथा निर्माता दिनेश कोइराला हुन् । पछिल्लो समय एकै प्रकारका विषयवस्तुमा आधारित फिल्महरू बढी आइरहेका बेला ‘बिगुल’ले भने राजनीति, परिवार, समाज, सम्बन्ध र मनोरञ्जनलाई एकसाथ समेटेर कथा बुनेको निर्देशकको दाबी छ । दर्शकले फिल्ममार्फत मनोरञ्जनसँगै आफ्नो घर, समाज र देशमा भइरहेका गतिविधि तथा राजनीतिक अवस्थाबारे पनि सोच्न पाउने विश्वास निर्देशक कोइरालाले व्यक्त गरेका छन् ।
‘फिल्मलाई केवल मनोरञ्जनका रूपमा मात्र होइन, विचारका रूपमा पनि हेर्नुपर्छ भन्ने सोचका साथ ‘बिगुल’ निर्माण गरेका हौं,’ यसअघि मन मनमा, लीला र नीरमाया निर्देशन गरिसकेका वरिष्ठ निर्देशक कोइराला भन्छन्, ‘हरेक नागरिकलाई आफ्नो देश र समाजप्रति जिम्मेवार बनाउन फिल्मले महत्त्वपूर्ण भूमिका खेल्न सक्छ ।’
कथाकार तथा निर्माता दिनेश कोइरालाका अनुसार ‘बिगुल’मा उठाइएका मुख्य मुद्दा र अहिलेको जेन्जी पुस्ताले अघि सारेका माग, देश विकास र परिवर्तनप्रतिको चाहना आपसमा मेल खान्छन् । जेन्जी आन्दोलनप्रति समर्पित गरिएको फिल्ममा बेनीशा हमाल, नरेन खड्का, रमेश बुढाथोकी, नीर शाह, सरोज खनाल, हेमन्त बुढाथोकी, शिशिर वाङ्देल, विनोद न्यौपाने, जेएन घिमिरे, गीता अधिकारी, मीरा पण्डित र मानश्री शर्मालगायत कलाकारको अभिनय रहेको छ ।
म्याग्नोलिया ग्रुपको ब्यानरमा निर्माण भएको ‘बिगुल’ कल्पना पौडेलको प्रस्तुति हो । फिल्मको पटकथा तथा संवाद प्रदीप भारद्वाज र मौनता श्रेष्ठले लेखेका हुन् । शिव ढकालको छायांकन रहेको फिल्ममा कमल राई र कविराज गहतराजको नृत्य निर्देशन, एनभी महर्जनको द्वन्द्व निर्देशन, विश्वप्रकाश शर्मा, अर्जुन पोखरेल र मनोज चौलागाईंको संगीत समावेश छ । सम्पादन तारा थापा ‘किम्भे’ले गरेका हुन् ।
सूर्यकान्त कोइराला र महेश कोइराला सह–निर्माता रहेको फिल्मको वितरण काफिया फिल्म्स र श्री ब्याङ्केट्स इन्टरटेन्मेन्टले गर्नेछन् ।
