घोराही, मंसिर २०
दाङको घोराहीस्थित दाङ भ्याली कलेजको प्राङ्गणमा सम्पन्न चौथो राष्ट्रिय विद्यालयस्तरीय हाप्किडो प्रतियोगिता मा दाङ भ्याली कलेज हाप्किडो डोजाङ च्याम्पियन बनेको छ ।
नेपाल हाप्किडो संघको आयोजनामा मंसिर १६ देखि २० गतेसम्म चलेको प्रतियोगितामा दाङ भ्याली कलेजले ९ स्वर्ण, ९ रजत र १२ कास्य पदक जित्दै उपाधि हात पारेको हो ।
लालमटियाको गोरखा आइडियल स्कुल ५ स्वर्ण र ३ कास्यसहित उपविजेता बन्यो भने डडेलधुराको दुर्गा मावि ३ स्वर्ण, २ रजत र ३ कास्यसहित तेस्रो बन्यो ।
उत्कृष्ट खेलाडी पुरुषतर्फ दुर्गा माविका चन्द्र सारु मगर र महिलातर्फ कास्कीकी मेग्मा गुरुङ घोषित भए ।
राइजिङ स्टारतर्फ करलस खड्का र ज्यास्लीन पौडेल सम्मानित भए ।
उत्कृष्ट रेफ्रीमा अमृत गुरुङ र एलिशा खड्का चयन भए ।
पाँच दिनसम्म चलेको प्रतियोगितामा सातै प्रदेशका १५४ विद्यालयका खेलाडी सहभागी थिए ।
