🏆 लालीगुराँसलाई तार्केश्वर मेयर रनिङ शिल्ड

काठमाडौं, मंसिर २१
तार्केश्वर नगरपालिकाको आयोजनामा सञ्चालित चौथो मेयर रनिङ शिल्ड प्रतियोगिता लालीगुराँस विद्यालयले जितेको छ । योसँगै लालीगुराँसले लगातार तेस्रोपटक उक्त उपाधि हात पारेको हो ।

नगरप्रमुख कृष्णहरि महर्जनको प्रमुख आतिथ्यमा नगरपालिकाको सभाहलमा आयोजित समापन समारोहमा प्रतियोगिताको औपचारिक समापन गरिएको हो । मंसिर १३ गतेदेखि सुरु भएको प्रतियोगितामा तार्केश्वरका ६४ विद्यालयका २ हजार ६ सय ८६ विद्यार्थी सहभागी थिए । प्रतियोगितामा कुल ७८ स्वर्ण, ७८ रजत र ११२ कास्य पदकका लागि प्रतिस्पर्धा भएको थियो ।

लालीगुराँसले ३२ स्वर्ण, ६ रजत र ३ कास्य पदकसहित उपाधि जित्दै नगद १ लाख रुपैयाँ, ट्रफी र प्रमाणपत्र प्राप्त गरेको छ । दोस्रो स्थानमा रहेको हिमरश्मी स्कुलले १० स्वर्ण, १९ रजत र १३ कास्य पदकसहित ६० हजार नगद, शिल्ड र प्रमाणपत्र प्राप्त गर्‍यो । तेस्रो स्थानमा रहेको किन्डर गार्डेन स्कुलले ५ स्वर्ण, ७ रजत र १ कास्यसहित ४० हजार नगद पुरस्कार पायो । एन्जल्स हार्ट सेकेन्डरी स्कुलले सान्त्वना स्थानसहित २० हजार नगद प्राप्त गर्‍यो ।

सामुदायिक विद्यालयतर्फ मानसिंह धर्म मावि पहिलो, ग्रामसेवा मावि दोस्रो र मनमैजु मावि तेस्रो बने । १६ सामुदायिक विद्यालयमध्ये ९ विद्यालयले मात्रै पदक जित्न सफल भए ।

“खेल तार्केश्वरको, सन्देश एकताको” भन्ने मूल नारासहित सम्पन्न प्रतियोगितामा फुटबल, बास्केटबल, टेबलटेनिस, ब्याडमिन्टन, कराते, उसु, तेक्वान्दो, चेससहित ११ विधाका खेल समावेश थिए ।

समापन समारोहमा नगरप्रमुख महर्जनले खेलकुदले तार्केश्वरको इतिहास रचिरहेको उल्लेख गर्दै सामुदायिक विद्यालयमा खेलकुद शिक्षकको व्यवस्था गरिने घोषणा गर्नुभयो । उपप्रमुख सृजना बुर्लाकोटी अर्यालले राष्ट्रियस्तरको रनिङ शिल्ड जित्ने लक्ष्यसहित तयारीमा लाग्न आग्रह गर्नुभयो ।