बिराटनगर, मंसिर १५ — पशु क्वारेन्टाइन कार्यालय विराटनगरले आ.व. २०८२/८३ को पहिलो त्रैमासिक प्रतिवेदन सार्वजनिक गर्दै निर्धारित कार्यको ८३.३७ प्रतिशत भौतिक प्रगति र ४७.५५ प्रतिशत वित्तीय प्रगति हासिल गरेको जानकारी दिएको छ। कार्यालय प्रमुख डा. विदुर प्रसाद गौत्तमका अनुसार अवैध पशु तथा पशुजन्य सामग्री नियन्त्रणलाई प्राथमिकतामा राखेर कार्य प्रभावकारी ढंगले अघि बढाइएको छ।
कार्यालयले विराटनगरको रानी, सुनसरीको भान्टाबारी र सिराहाको माडर नाकाबाट हुने आयात–निर्यातमाथि नियमित निगरानी गर्दै कडाइका साथ जाँच सञ्चालन गरेको प्रतिवेदनमा उल्लेख छ।
पहिलो त्रैमासिकमा अवैध रूपमा भित्रिने जोखिमयुक्त सामग्री नियन्त्रणमा विशेष ध्यान दिइएको कार्यालयले জানিয়ो। स्वास्थ्य परीक्षण, क्वारेन्टाइन प्रमाणपत्र जारी गर्ने कार्यलाई सुदृढ गर्दै आयातकर्ता तथा निर्यातकर्ता उद्योगसँग निरन्तर समन्वय गरिएको छ। अवैध सामग्री नष्ट गर्ने अभियान पनि यस अवधिमा थप सशक्त रूपमा सञ्चालन गरिएको प्रतिवेदनले देखाउँछ।
अनुगमनका क्रममा कार्यालयका टोलीले ३२ पटक निरीक्षण गरी ठूलो परिमाणका अवैध पशुजन्य सामग्री नियन्त्रणमा लिएर नष्ट गरेका छन्। नष्ट गरिएका सामग्रीमा—
- २४० केजी ब्रोलर कुखुराको मासु
- ३२९ वटा बोइलर कुखुरा
- २९ क्रेट सेतो अण्डा
- १०४ केजी पहिचान नभएको आलो मासु
- ३० केजी प्याकेज्ड सी–फिस
- १० पिस एक्वेरियम माछा
- ७३५ केजी फ्रोजन फिस
- २० केजी माछाको सिद्रा
समावेश छन्।
भारत–नेपाल सीमाबाट भित्रिने पशु तथा पशुजन्य वस्तुको स्वास्थ्य परीक्षण, संक्रमण जोखिम रोकथाम तथा सवारीसाधन स्यानिटाइजेसन नियमित रूपमा भइरहेको कार्यालयले स्पष्ट गरेको छ।
यसबाहेक, आयातित कच्चा पदार्थको गुणस्तर परीक्षणका लागि नमुना संकलन गरी प्रयोगशाला परीक्षण गरिएको पनि प्रतिवेदनले उल्लेख गर्छ। सीमा क्षेत्रमा अवैध सामग्री नियन्त्रणका लागि स्थानीय प्रशासन तथा सुरक्षासम्बन्धी निकायसँग निरन्तर समन्वय जारी रहेको कार्यालयको भनाइ छ।
