उखु किसानहरूको चेतावनी: १३ गतेसम्म अनुदान भुक्तानी नभए १४ गतेदेखि सशक्त आन्दोलन

काठमाडौं, ९ मंसिर ।
नेपाल उखु उत्पादक महासंघले सरकारले तोकिएको समयभित्र अनुदान रकम भुक्तानी नगरे कडा आन्दोलनमा उत्रिने चेतावनी दिएको छ। मंगलबार रिपोर्टर्स क्लब नेपालमा आयोजित पत्रकार सम्मेलनमा किसानहरूले मंसिर १३ गतेभित्र करीब ७५ करोड रुपैयाँ अनुदान रकम भुक्तानी नभए र उखुको प्रति क्विन्टल मूल्य ७५० रुपैयाँ कायम नगरिए मंसिर १४ गतेदेखि आन्दोलन सुरु गर्ने घोषणा गरे।

महासंघका प्रतिनिधि महेशचन्द्र यादवका अनुसार, “विगत वर्षको प्रति क्विन्टल ३५ रुपैयाँ अनुदानका आधारमा झन्डै ७५ करोड रुपैयाँ अझै बाँकी छ। यो रकम हामीले मंसिर १३ भित्रै भुक्तानी पाउनै पर्छ,” उनले भने।

किसानहरूले उखुको उत्पादन लागत र चिनीको बजार मूल्यलाई मध्यनजर गर्दै सरकार, चिनी उद्योग तथा किसान प्रतिनिधि सम्मिलित त्रिपक्षीय बैठकमार्फत उचित मूल्य निर्धारण गर्नुपर्ने माग पनि राखेका छन्।

आन्दोलनका लागि दबाब बढाउँदै किसानहरूले आज कृषि मन्त्री डा. मदन परियारमार्फत प्रधानमन्त्री कार्यालय र अर्थ मन्त्रालयमा ज्ञापनपत्र बुझाएका छन्।
माग पूरा नभए आन्दोलन चरणबद्ध रूपमा अघि बढाइने महासंघले जनाएको छ।

अनुसार:

• मंसिर १४ गते सर्लाहीको हरिवनमा राष्ट्रिय राजमार्ग एक घण्टा जाम
• मंसिर १५ गतेदेखि एक लाख किसान परिवारको प्रतिनिधित्व गर्दै अनिश्चितकालीन राजमार्ग अवरोध सुरू

किसानहरूले यसपटक सरकारलाई माग पूरा गराउन बाध्य बनाउने स्पष्ट चेतावनी दिएका छन्।