उपत्यकामा सुनको सिक्री चोरी र लुटपाटमा संलग्न पाँच जना पक्राउ

काठमाडौं । उपत्यकाका विभिन्न स्थानमा सुनको सिक्री चोरी र लुटपाटमा संलग्न रहेको अभियोगमा पाँच जना पक्राउ परेका छन् । प्रहरीले उनीहरूलाई नियन्त्रणमा लिएर चोरी सम्बन्धी मुद्दामा काठमाडौं जिल्ला अदालतबाट आठ दिनको म्याद थप गरी अनुसन्धान थालेको जनाएको छ । पक्राउ परेका व्यक्तिहरूको समूहले मोटरसाइकल प्रयोग गरी महिलाको गला र झोलाबाट सिक्री तान्ने र त्यसलाई सुन पसलमा बिक्री गर्ने कार्य गर्दै आएको खुलेको छ ।

पक्राउ परेका व्यक्तिहरू

स्वयम्भू वृत्तबाट खटिएको प्रहरी टोलीले पक्राउ गरेका पाँच जनामध्ये दुई जना लुटपाटमा प्रत्यक्ष संलग्न र तीन जना चोरीका सिक्री किनबेचमा संलग्न रहेको पाइएको छ ।

• राज लामा (२८ वर्ष) — सिन्धुली हरिहरगढी गाउँपालिका–६ घर, हाल भक्तपुर सूर्यविनायक–५ तिनधारे डेरा; सिक्री लुटपाटका क्रममा मोटरसाइकल चलाउने व्यक्ति।
• विशाल भनिने दुर्गबहादुर मगर (२० वर्ष) — उदयपुर ताप्ले गाउँपालिका–४ घर, हाल भक्तपुर बसोबास; मोटरसाइकलको पछाडि बसेर सिक्री तान्ने व्यक्ति।
• दिलबहादुर बि.क. (३२ वर्ष) — रामेछाप लिखु तामाकोसी गाउँपालिका–६ घर, हाल भक्तपुर चाँगुनारायण–२ सल्लाघारीमा श्री लक्ष्मी ज्वेलर्सका सञ्चालक; लुटिएको सिक्री बिक्री गर्ने व्यक्ति।
• गोबिन्द सुनार (४० वर्ष) — बागलुङ गल्कोट नगरपालिका–२ घर, हाल बूढानीलकण्ठ–६ सरस्वतीनगरस्थित बागलुङ कालिका ज्वेलर्सका सञ्चालक; लुटिएको सुन किन्ने व्यक्ति।
• दिपेस रसाइली (२२ वर्ष) — कैलाली लम्कीचुहा नगरपालिका–७ घर, हाल काठमाडौं–२२ मनु जेम्स एण्ड ज्वेलर्सका सञ्चालक सन्तोष सुनारका छोरा; चोरी गरिएको सुन किन्ने व्यक्ति।

लुटपाट भएका स्थानहरू

यी व्यक्तिहरूले ललितपुर र काठमाडौंका विभिन्न स्थानमा रहेका महिलाबाट सिक्री लुटपाट गरेको प्रहरीले जनाएको छ ।

• ललितपुर नख्खुडोल — असोज ८ गते, १ तोला १० लालको सिक्री
• काठमाडौं सिङ्गल ट्री (नागार्जुन–३) — असोज २३ गते, १ तोला १५ लालको आधा सिक्री
• ललितपुर बुद्धचोक — असोज २६ गते, ३ तोलाको सिक्री
• काठमाडौं राधाकृष्ण मन्दिर नजिक (नागार्जुन–१) — कार्तिक १ गते, १ तोलाको आधा सिक्री
• रामकोट टेम्पो पार्क नजिक — कार्तिक १ गते, १ तोला २५ लालको आधा सिक्री
• नागार्जुन–५ थापाचोक नजिक — कार्तिक १ गते, झोला र मोबाइल लुटपाट
• तार्केश्वर–बालाजु नेपालटार — कार्तिक १ गते, २ तोलाको सिक्री

बरामद सामानहरू

पक्राउ परेकासँगै प्रहरी टोलीले विभिन्न मोबाइल, सिम कार्ड, सुनका ढिक्का, नगद र मोटरसाइकलहरू समेत बरामद गरेको जनाएको छ ।

राज लामा र दुर्गबहादुर मगरको कोठाबाट:

• Samsung मोबाइल ४ थान, Redmi २ थान, iPhone ३ थान, ITEL ३ थान
• सिम कार्ड (नेपाल टेलिकम ३०, Ncell ३७), मेमोरी कार्ड ३ थान
• मोटरसाइकल दुई थान (बा.प्र.०२–०३७ प ७३१९ र बा.प्र.०२–०५१ प ६६३०)
• विभिन्न चालक अनुमति पत्र, अदालतका कागजात र लत्ताकपडा

दिलबहादुर बि.क.को पसल (लक्ष्मी ज्वेलर्स) बाट:

• सिक्री बिक्री गरी ल्याएको नगद रु. ३,८८,५००।–

दिपेस रसाईलीको कोठाबाट:

• जम्मा ६४ लाल तौल भएको सुनका ढिक्का ४ थान

गोबिन्द सुनारको पसल (बागलुङ कालिका ज्वेलर्स) बाट:

• जम्मा ७ तोला ४८ लाल सुन (विभिन्न आकारका ढिक्का र सिक्री)
• नगद रु. १,६६,०००।–

अनुसन्धान जारी

प्रहरीले लुटपाटमा प्रयोग गरिएका मोटरसाइकल र बरामद भएका सुनका ढिक्काहरू फरेन्सिक परीक्षणका लागि पठाएको छ । पक्राउ परेकामाथि थप अनुसन्धान जारी रहेको र घटनामा संलग्न अन्य व्यक्तिहरूको खोजी भइरहेको काठमाडौं प्रहरी परिसरले जनाएको छ ।