काठमाडौँ, कात्तिक ३ गते ।
दक्षिण एसियाली सिनियर एथलेटिक्स च्याम्पियनसिपमा सहभागी हुन २६ खेलाडीसहित ३० सदस्यीय नेपाली टोली बुधबार भारतको राँची प्रस्थान गर्ने भएको छ । उक्त प्रतियोगिता अक्टोबर २४ देखि २६ तारिखसम्म सञ्चालन हुने छ ।
प्रतियोगितामा मुकेश पाल, राजन रोकाया, सोम कुमाल, सलिन देवान, सन्तोषी श्रेष्ठ, पूर्णलक्ष्मी न्यौपाने, सुशील केसी, शिवराज पार्की, अरुण महतो, रामचन्द्र थारु, तिलक विक, युवराज विक, गणेशसिंह रावत, नागेश्वर ऐर, चन्द्रदेव जोशी, प्रवीण राना, बसन्ती चौधरी, सिमाकुमारी थारु, जयरानी थारु, सिता शाही, सर्मिलाकुमारी थारु, सरस्वती चौधरी, रन्जिता अधिकारी, डिना गोपाली र नारायणी भण्डारीले विभिन्न स्पर्धामा प्रतिस्पर्धा गर्ने छन् ।
टोलीको प्रशिक्षणको जिम्मेवारी राकेश वज्राचार्य र धनीराम चौधरीले सम्हाल्ने छन् भने व्यवस्थापकमा दिपेन्द्रकुमार गोइत र अफिसियलका रूपमा अनिरुद्र चौधरी रहने छन् ।
नेपालबाट प्रस्थान गर्नुअघि राष्ट्रिय खेलकुद परिषद्का सदस्य–सचिव टंकलाल घिसिङले सोमबार एक कार्यक्रमका बीच टोलीलाई शुभकामना दिँदै बिदाइ गरे ।
