काठमाडौँ । सञ्चार तथा सूचना प्रविधि मन्त्री जगदीश खरेलले वर्तमान सरकारको मुख्य कार्यादेश प्रतिनिधिसभाको निर्वाचन गराउनु रहेको बताएका छन्। उनले यसो भनेको सरकार ‘जेनजी’ आन्दोलनको आधारमा बनेको र सबै राजनीतिक दल तथा जनताको सहभागितामा तोकिएको समयावधिमा निर्वाचन सम्पन्न गर्नु आवश्यक भएको हो।
राष्ट्रिय समाचार समितिको भद्रकालीस्थित केन्द्रीय कार्यालयको आजको अवलोकन भ्रमणपछि आयोजित कार्यक्रममा मन्त्री खरेलले आगामी फागुन २१ गते हुने निर्वाचनको लागि अनुकूल वातावरण सिर्जना गर्न सबैसँग सहयोगको अपिल गरे।
निर्वाचन सम्बन्धमा सरकारका तर्फबाट प्रधानमन्त्री सुशीला कार्कीले प्रतिबद्धता दिइसकेको स्पष्ट पार्दै उनले भने कि निर्वाचनको वातावरण निर्माणमा सञ्चार माध्यमको भूमिका महत्त्वपूर्ण रहने विश्वास छ।
सरकारका प्रवक्ता समेत रहेका मन्त्री खरेलले भने, “यो सरकार जेनजी आन्दोलनको जगमा बनेको हो र सबै राजनीतिक दल तथा जनताको चाहना अनुसार निर्वाचनतर्फ अघि बढ्न आवश्यक छ। निर्वाचन आयोगले कार्यतालिका प्रकाशन गरिसकेको छ। राससले पनि वातावरण निर्माणमा भूमिका खेल्नेछ भन्नेमा म विश्वस्त छु।”
उनले थपे कि सरकारको ‘म्यान्डेट’मा निर्वाचन मात्र होइन, सुशासन स्थापना, भ्रष्टाचार नियन्त्रण, जेनजी आन्दोलनको क्रममा भएको जनधनको क्षतिमाथि छानबिन र कारबाही, साथै प्राकृतिक विपद् पछिको राहत र पुनःस्थापना पनि रहेको छ। आगामी निर्वाचनको वातावरण तयार पार्न सरकार प्रत्यक्ष तथा अप्रत्यक्ष रूपमा राजनीतिक दलहरूसँग संवादमा रहेको उनले बताए।
