मुगु । मुगुको रारा विमानस्थलमा आज चार महिनापछि नेपाल एयरलाइन्सको उडान भरेको छ। नेपाल सरकारको स्वामित्वमा रहेको नेपाल एयरलाइन्सले यसअघि गत वैशाखसम्म रारा विमानस्थलमा हप्तामा तीन दिन नियमित उडान सञ्चालन गर्दै आएको थियो।
नियमित उडान हुँदा स्थानीयवासी र यात्रुहरूलाई सहजता महसुस भएको थियो। तर चार महिनादेखि उडान बन्द हुँदा रारा तालको भ्रमण गर्न आउने पर्यटक तथा अन्य यात्रुहरूलाई हवाई यातायातमा समस्या झेल्नुपरेको थियो। आजदेखि नेपाल एयरलाइन्सले रारा विमानस्थलमा पुनः उडान सुरु गरेको छ, जानकारी विमानस्थल कक्षका प्रमुख नवीनकुमार विष्टले दिएका छन्।
नेपालगन्जमा उपचारका लागि यात्रा गर्दै गर्दा उडानको सुविधा पाउने यात्रु सुमित्रा रावलले भने, “नियमित उडान भए दुर्गम क्षेत्रका जनताले ठूलो राहत पाउने थिए।”
विभिन्न कारणले लामो समयसम्म नियमित उडान सम्भव नभए पनि प्रमुख विष्टले अब नियमित उडान सञ्चालनका लागि पहल गर्ने प्रतिबद्धता व्यक्त गरेका छन्। रारा विमानस्थलमा यसअघि समिट एयर, तारा एयर, सीता एयर र नेपाल एयरलाइन्सले उडान भर्दै आएका छन्।
