काठमाडौं, जेठ २६
नेपाल स्क्वास र्याकेट्स संघको आयोजनामा हुने १३औँ एनएसआरए राष्ट्रिय स्क्वास च्याम्पियनसिप आगामी जेठ २७ देखि ३१ गतेसम्म सातदोबाटोस्थित संघको एकेडेमी हलमा सञ्चालन हुनेछ।
प्रतियोगितामा पुरुषतर्फ ६ प्रदेशका टिमले सहभागिता जनाउनेछन्। ती टिमलाई दुई समूहमा विभाजन गरिएको छ —
पुल ए: गण्डकी, लुम्बिनी, मधेश
पुल बी: बागमती, कोशी, कर्णाली
प्रतियोगिता लिग कम नकआउट प्रारूपमा हुनेछ, जसअन्तर्गत प्रत्येक पुलबाट शीर्ष दुई टिम सेमिफाइनलमा प्रवेश गर्नेछन्। प्रत्येक टिममा चार खेलाडी रहनेछन्।
महिला टिम इभेन्ट्समा बागमती, गण्डकी र कोशी प्रदेशले सहभागिता जनाएका छन्। यस विधामा लिग चरणको शीर्ष स्थान हासिल गर्ने टिमले उपाधि जित्नेछ।
बागमती प्रदेशलाई पुरुष तथा महिला दुवैतर्फ उपाधिको बलियो दाबेदारका रूपमा हेरिएको छ।
पुरुषतर्फ: नेपालका शीर्ष स्क्वास खेलाडी अरहन्त के सिम्ह र पासाङ ब्लोन बागमतीबाट प्रतिस्पर्धा गर्दै छन्।
महिलातर्फ: नेपालकी नम्बर एक विपना ब्लोन र नम्बर दुई स्वस्थानी श्रेष्ठ बागमती टोलीमा छन्।
