काठमाडौं, जेठ २२
नेपाल तेक्वान्दो संघको आयोजनामा पहिलो पटक टिम ग्यरोगी मात्र समेटिएको ‘प्रथम एनटिए राष्ट्रिय टिम ग्यरोगी च्याम्पियनसिप’ प्रतियोगिता आगामी असार १ र २ गते हुने भएको छ।
विश्व तेक्वान्दोको टिम ग्यरोगी नियमअनुसार सञ्चालन हुने यो प्रतियोगितामा १२–१४ वर्ष उमेर समूहका क्याडेट ब्वाइज र गल्र्स तथा १५–१७ वर्ष समूहका जुनियर ब्वाइज र गल्र्स गरी चार स्पर्धा समावेश गरिएको हो।
बिहीबार आयोजित पत्रकार सम्मेलनमा संघले प्रतियोगितामा करिब ७०० खेलाडीको सहभागिता अपेक्षा गरिएको जानकारी दियो। विजेता टिमले ५० हजार नगदसहित ट्रफी, मेडल र प्रमाणपत्र प्राप्त गर्नेछ भने उपविजेताले २५ हजार रुपैयाँसहित सम्मान पाउनेछ।
प्रतियोगिताको अनुमानित लागत १२ लाख ५५ हजार रुपैयाँ रहेको छ, जसको सम्पूर्ण व्यवस्थापन नेपाल तेक्वान्दो संघले गर्ने जनाएको छ।
