प्रधानमन्त्री देउवा डडेल्धुरामा व्यस्त, आज दुई आमसभालाई सम्बोधन गर्ने

काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवाले आज दुईवटा चुनावी सभालाई सम्बोधन गर्ने कार्यक्रम छ।

उनले नवदुर्गा गाउँपालिका र गृहपालिका गन्यापधुराको चुनावी सभालाई सम्बोधन गर्दैछन्। देउवा मंसिर ४ मा हुने चुनावमा डडेल्धुराबाट उम्मेदवार छन्।

सत्ता गठबन्धनका उमेदवारलाई जिताउनका लागि माहोल तयार पार्न प्रधानमन्त्री देउवा बिहीबारदेखि डडेल्धुरामा छन्। उनले सदरमुकामको चुनावी आमसभालाई बिहीबार सम्बोधन गरेका थिए।

प्रधानमन्त्री देउवा अझै केही दिन जिल्लामा रहने कार्यक्रम तय भएको छ। उनी सातवटा चुनावीसभामा सहभागी हुनेछन्।

प्रधानमन्त्री देउवाले गठबन्धनका साथै कांग्रेस नेता तथा कार्यकर्तासित भेटघाट गर्ने कार्यक्रम छ।

चुनावी सभालाई प्रधानमन्त्री देउवासँगै कांग्रेस केन्द्रीय सदस्य एवं उनका धर्मपत्नी आरजु देउवा, केन्द्रीय सदस्य नैनसिंह महर, माओवादी केन्द्रका तर्फबाट प्रदेशसभा (क) का उम्मेदवार खगराज भट्ट, प्रदेशसभा (ख) का उम्मेदवार एवं सुदूरपश्चिम प्रदेशका समाजिक विकासमन्त्री गोविन्दराज बोहरा, नेकपा (एकीकृत समाजवादी) की नेतृ निरा जैरु, जनमोर्चाका नेता नन्दराज भट्ट लगायतले सम्बोधन गर्ने कार्यक्रम रहेको संयुक्त वाम–लोकतान्त्रिक गठवन्धनका चुनावी संयोजक भीमबहादुर साउदले बताए।

प्रधानमन्त्री देउवाले आज बिहान नवदुर्गा गाउँपालिकाको खुनी र दिउँसो गन्यापधुरा गाउँपालिकाको बडाल, कात्तिक १९ गते अजयमेरु गाउँपालिकाको भद्रपुर र भागेश्वर गाउँपालिकाको रुपाल तथा कात्तिक २० गते आलिताल गाउँपालिकाको गोदाम र परशुराम नगरपालिकाको जोगबुढामा गठबन्धनले आयोजना गर्ने चुनावीसभालाई सम्बोधन गर्नेछन्। रासस