गुल्मीमा एकजना उमेदवार जम्मा एक मतको अन्तरले वडाध्यक्षमा विजयी भएका छन् । गुल्मीको कालिगण्डकी गाउँपालिका–२ अर्वेनीमा नेपाली काँग्रेसका उमेदवार रेशमराज न्यौपाने एमाले उमेदवार बाबुराम न्यौपानेलाई जम्मा एक मतले पछाडि पार्दै विजयी भएका हुन् । विजयी न्यौपानेले ७५६ मत प्राप्त गरेका छन भने पराजित न्यौपानेले ७५५ मत प्राप्त गरेका छन् ।
निर्वाचन कार्यालय कालीगण्डकी गाउँपालिकाले विजेता घोषणा गरेको स्थानीयवासी तथा नेपाल पत्रकार महासंघका सदस्य प्रेम पाँडेले जानकारी दिए । उनका अनुसार वडा नम्वर १ हर्मिचौरमा भने पुनः मत गणना सुरु भएको छ । त्यस वडामा खसेको कुल मत १४३५ रहेकोमा गणना गर्ने बेलामा १४८७ मत फेला परे पछि पुनः मत गणना भएको हो ।
सो पालिकामा काँग्रेस र जनमोर्चा बिच र एमाले र माओवादी बीच अलग अलग चुनावी तालमेल भएको छ । जसअनुसार गाउँपालिकाका निवर्तमान अध्यक्ष तथा काँग्रेस पालिका अध्यक्ष उमेदवार वेद थापामगर एमाले अध्यक्षका उमेदवार रामजी ढकाल भन्दा धेरै पछाडि छन् ।
