ओली पक्षीय नेताले आयोगलाई भने : दल दर्ता अगाडी बढाउनुस्, हामी प्राथमिकता दिएर सहयोग गर्छौं

काठमाडौं । नेकपा अ‍ोली समूहका नेताहरुले दल दर्ता प्रक्रिया अगाडि बढाउन निर्वाचन आयोगलाई आग्रह गरेको छ ।

आयोगले दल दर्ता र निर्वाचनको तयारीका क्रममा हालसम्म भएका कामबारे छलफल गर्न नेकपाको दुबै समूहलाई बोलाएको थियो । तर प्रचण्ड-माधव समूहका नेताहरुले अध्यक्षद्धय राजनीतिक कार्यक्रमका लागि बाहिर भएकाले माघ १८ गतेपछि मात्र छलफलमा आउन सक्ने लिखित जानकारी दिएको छ ।

ओली समूहका नेता विष्णु पौडेल, सुवास नेम्वाङ लगायतका नेताहरुले भने आयोगका पदाधिकारीहरुसँग छलफल गरेका छन् । सर्वोच्च अदालतले अन्तिम आदेश जारी नगरेकाले निर्वाचन प्रक्रिया अगाडि बढाउनुपर्ने नेताहरुले बताए ।

दल दर्ता अगाडी बढाउनुस्, हामी प्राथमिकता दिएर सहयोग गर्छौ भनेका छौं, छलफलपछि नेता नेम्वाङले सञ्चारकर्मीहरुलाई भने, आयोगले पनि सर्वोच्चले अन्यथा आदेश नगरेमा तोकिएकै समयमा चुनाव गर्न प्रतिबद्ध छौं भनेको छ ।