कानूनले तोकेको उमेर नपुगेका बाललिकासँग राखिएको यौन सम्बन्धलाई बलात्कार नै मानिन्छ चाहे त्यो दुवैको सहमितमा नै किन नभएको होस । नेपालको कानून अनुसार यौन सम्बन्धको लागि सहमत हुन कम्तीमा पनि १८ बर्ष पुगेको हुनुपर्छ । यदि १८ बर्षभन्दा कम उमेरमा कसैले यौन सम्बन्ध राख्छ भने त्यो बलात्कार नै ठहरिन्छ । त्यसको लागि दुवै पक्षको सहमति नै भएपनि कानूनी हिसाबले त्यो बलात्कार हो ।
हरेक देशमा यसबारे एउटै नियम छैन । केही देशहरुमा यौन सम्बन्ध राख्नको लागि २० बर्ष पुगेको हुनुपर्छ भने कतै त्यो भन्दा बढी उमेरको कानून बनाइएको छ । यो एक हिसाबले राम्रो पनि हो । किनकी १८–२० बर्ष नभइ त हाम्रो शरीरको अगं राम्रोसँग विकसित भैसकेका हुदैँनन् । जसका कारण सानो उमेरमा यौन सम्बन्ध राख्दा त्यसले स्वास्थ्यमा निकै असर पार्न सक्छ । तर फिलिपिन्समा भने १२ बर्ष उमेर पुगेपछि सहमितमै यौनसम्बन्ध राख्न पाइन्छ र यसलाई अपराध पनि मानिदैँन ।
फिलिपिन्समा यो नियमको धेरैले गलत फाइदा उठाइरहेका छन् । सानो उमेरको यौन सम्बन्धलाई अपराध नमान्दा फिलिपिन्समा सानो उमेरमा नै धेरै बालिकाहरु बलात्कारको सिकार भएका छन् भने कतिमाथि त यौन हिंसा पनि भएको छ । त्यसैले अब फिलिपिन्समा यो नियम बारे कानून परिमार्जन गर्न लागिएको छ । धेरै समयको मागपछि अब फिलिपिन्सले यौन सम्बन्धको लागि अब १६ बर्ष पुग्नैपर्ने कानून बनाउने तयारीमा छ । तर यसबारे अहिले पनि छलफल भएकाले यो खबरलाई पक्का मान्न भने सकिदैँन ।