काठमाडौं । रुपन्देही, देबदह नगरपालिका-१० स्थित सडकमा लु.२ ख ८९९ नम्बरको टिपरले ध.१ प ९७९५ नम्बरको स्कुटरलाई शनिबार दिउँसो ठक्कर दिँदा स्कुटर चालक कपिलबस्तु नगरपालिका-४ तौलिहवा बस्ने प्रहरी जवान ३३ वर्षीय अमित श्रेष्ठको मृत्यु भएको छ ।
ठक्करबाट गम्भीर घाइते भएका अमितको लुम्बिनी प्रादेशिक अस्पताल बुटवल हुँदै मेडिकल कलेज भैरहवामा थप उपचारको क्रममा मृत्यु भएको हो । दुर्घटनामा घाइते भएकी मोटरसाइकलमा सवार सैनामैना नगरपालिका-४ घर भएकी प्रहरी जवान २३ वर्षीया सन्तोषी थारुको सोही अस्पतालमा उपचार भइरहेको छ ।
जिल्ला प्रहरी कार्यालय वाग्लुङमा कार्यरत दुवैजना विदामा घर फर्कने क्रममा दुर्घटनामा परेका हुन् । फरार रहेका टिपर चालकको प्रहरीले खोजी गरिरहेको छ ।
रौतहट, गरुडा नगरपालिका-१ जयनगरस्थित सडकमा शनिबार दिउँसो हाल नम्बर नखुलेको मोटरसाइकलको ठक्करबाट सोही स्थान बस्ने मोर्जे आलमकी ८ वर्षीया छोरी नजिया कुमारी खातुनको मृत्यु भएको छ । ठक्करबाट गम्भीर घाइते भएकी नजियाको गरुडा अस्पताल गरुडा हुँदै थप उपचारको लागि वीरगंजतर्फ लैजाँने क्रममा बाटोमै मृत्यु भएको हो । ठक्कर दिने मोटरसाइकल र चालकको प्रहरीले खोजी गरिरहेको छ ।
पाँचथर, फाल्गुनन्द गाउँपालिका-७ थुम्कीस्थित सडकमा शनिबार साँझ मे.१ त ६३०६ नम्बरको ट्याक्टरले किचेर सोही ट्याक्टरमा ज्याला काम गर्ने फाल्गुनन्द गाउँपालिका-६ ओसागु बस्ने ४० वर्षीय बल बहादुर कुरुङवाङको मृत्यु भएको छ ।
ट्याक्टरको ट्रलीबाट लडेर टायरले किच्दा उनको घटनास्थलमै मृत्यु भएको हो । फरार रहेका ट्याक्टर चालकलाई प्रहरीले खोजी गरिरहेको छ । यस सम्बन्धमा स्थानीय प्रहरीले आवश्यक अनुसन्धान गरिरहेको छ ।
