फलामे ढोका पर्खालभित्र
साथी म बन्दी छु
न्यायको गीत गाउँदै हिँड्दा
साथी म बन्दी छु
विदेश हैन युवाको पौरख देशभित्रै पोख्न देऊ
प्यारीको साथमा पसिना धारा माटोमा रोप्न देऊ
दिदी र बैनी पराइको देशमा बेचिन नदेऊ
भनेर युवा आवाज गाउँदा साथी म बन्दी छु
ढुकुटीमाथि लामो हात गरे देश भो बर्बाद
माटोको माया गर्छु भन्नेलाई छैन क्यै पर्वाह
भ्रष्टका धन जफत गर राज्यको बनाऊ
भनेर देशको हितमा गाउँदा साथी म बन्दी छु
सिमाना हाम्रो खुम्चिँदै गयो मिच्दै छ छिमेकी
पराइको हेपाइ सहेर कति बस्ने हो नेपाली
माटोको खातिर जाग्नुपर्ने भो लड्नु नै पर्ने भो
भनेर देशको स्वाभिमान गाउँदा साथी म बन्दी छु
मान्छेले मान्छे ठगेर खाने चलन मेटाइदिऊँ
विभेदका पर्खाल ढालेर सबै समान बनाइदिऊँ
सुखले जिऊन् नेपालीजन शान्तिले बाँच्न देऊ
भनेर देशको समृद्धि गाउँदा साथी म बन्दी छु ।।
-माइला लामा