कोभिड १९ अर्थात कोरोना भाईरस संक्रमितको संख्या बढदै गएपछि उपत्यकामा निषेधाज्ञा लम्ब्याउने विषयमा मंगलबार अपरान्ह तीनवटै जिल्लाका सुरक्षा समितिको संयुक्त बैठक बस्दै छ।
गत भदौ ३ गते मध्यरातदेखि एक साताका लागि काठमाडौँ उपत्यकामा निषेधाज्ञा लागु गरिएको थियो। अहिले काठमाडौँ उपत्यकाभित्र प्रवेश गर्नसमेत निषेध गरिएको छ।
काठमाडौँ जिल्ला प्रशासन कार्यालयमा अपरान्ह ३ बजे बस्ने बैठकमा तीनवटै जिल्लाका प्रशासन प्रमुख र सुरक्षा निकायका प्रमुखलगायतको उपस्थिति रहने छ। स्रोतका अनुसार कोरोना संक्रमणको स्थिति उस्तै रहेकाले निषेधाज्ञा लम्ब्याउने सम्भावना छ।
सरकारले गत साउन ६ गते मध्यरातदेखि देशव्यापी लकडाउन अन्त्य भएको घोषणा गरेपनि पछिल्लो समय देशभरका ५० भन्दा बढी जिल्लामा पूर्ण तथा आंशिक निषेधाज्ञा लागु गरिएको छ।
तीनवटै जिल्लाका सुरक्षा समितिले स्थानीय प्रशासन ऐन २०२८ र संक्रामक रोग ऐन २०२० को प्रयोग गर्दै निषेधाज्ञा गरेका हुन्। यसअघि सोमबार काठमाडौँ उपत्यकाका मेयरहरुको फोरमले निषेधाज्ञा भदौ १५ गतेसम्म लम्ब्याउन सुझाव दिएको छ।
