काठमाडौं- उपत्यकाका तीन वटै जिल्लामा आज राति १२ बजेदेखि १० भदौ राति १२ बजेसम्मका लागि निषेधाज्ञा जारी गरिएको छ । काठमाडौंमा कोरोना संक्रमणको दर लगातार बढ्दै गएपछि निषेधाज्ञाको आदेश जारी गरिएको हो ।
तीन वटै जिल्लाका सुरक्षा समितिको संयुक्त बैठकले निषेधाज्ञामा सर्वसाधारणले के गर्न सक्छन् र उनीहरूका कस्ता क्रियाकलापमा रोक लगाउने हो भन्नेबारे निर्णण गरेर प्रमुख जिल्ला अधिकारीले त्यसैअनुसार आदेश जारी गरेका हुन् ।
उक्त आदेश अनुसार औषधि, खाद्यवस्तु तथा अन्य अत्यावश्यक उपभोग्यवस्तु वा सेवा खरिदको काममा बाहेक कुनै पनि व्यक्ति घरबाट बाहिर निस्कन मिल्दैन । यी काममा बाहेक उपत्यकाका तीन वटै जिल्लामा निजी तथा सार्वजनिक सवारीसाधन सञ्चालन गर्न पाइँदैन । त्यस्तै स्वास्थ्यकर्मी तथा सुरक्षा निकायले प्रयोग गर्ने सवारी साधनबाहेक काठमाडौं उपत्यकाभित्र सवारी साधन प्रवेश गर्न पाउँदैनन्। अत्यावश्यक सेवा तथा वस्तु बाहेकका अन्य सबै प्रकारका व्यापार व्यवसाय सञ्चालन गर्न पनि पाइँदैन।
प्रमुख जिल्ला अधिकारीहरूले जारी गरेका निषेधाज्ञामा समेटिएका ती आदेशको उल्लंघन गर्नेलाई कडा कारवाही हुनसक्छ । ती आदेशहरू संक्रामक रोग ऐन, २०२० अनुसार जारी भएकाले आदेशको उल्लंघन गर्नेलाई पनि सोही ऐनअनुसार कारवाही गरिने भएको छ ।
उक्त ऐनको दफा ३ मा त्यसरी दिइएको आदेश नमान्ने व्यक्तिलाई एक महिनासम्म कैद वा एक सय रूपैयाँसम्म जरिवाना वा दुवै सजाय हुनसक्ने प्रावधान छ ।
यही ऐनअनुसार आदेश कार्यान्वयन गर्न खटिएका अधिकृत व्यक्तिहरूको काममा बाधा पुर्याउनेलाई अझ कडा सजाय हुनसक्छ। सोही ऐनको दफा ३ को उपदफा २ मा त्यसरी बाधा पुर्याउने व्यक्तिलाई ६ महिनासम्म कैद वा रू. ६०० सम्म जरिवाना वा दुवै सजाय हुनसक्ने व्यवस्था छ ।
