काठमाडौं । प्रधानमन्त्री केपी शर्मा ओलीले आदिवासी जनजातिको राष्ट्रिय जीवनका विभिन्न पक्षमा पहुँच र प्रतिनिधित्वको सुनिश्चितासँगै आर्थिक समानतासहितको समतामूलक समाज निर्माण गर्न सरकार निष्ठापूर्वक सक्रिय रहेको बताएका छन् ।
छब्बीसौं विश्व आदिवासी अवसरमा शुभकामना सन्देश दिँदै उनले नेपालको संविधान र प्रचलित कानूनअनुसार सम्पूर्ण आदिवासी जनजातिको सामाजिक, आर्थिक, सांस्कृति, भाषिक कला साहित्य एवं सीप आदिको उत्थान र विकास गरी समृद्ध नेपाल सुखी नेपालीको साष्ट्रिय आकाङ्क्षा सफल बनाउन सम्पूर्ण समुदायलाई समान अवसर सुरक्षा न्यायको प्रत्याभूति गर्ने राज्यले लिएको जनाएका छन् ।
प्रधानमन्त्री ओलीले समृद्ध नेपाल सुखी नेपालीको राष्ट्रिय आकाङ्क्षा पूरा गर्ने लक्ष्य तय भएकोमा महामारीपछि नेपाललगायत विश्वमै नागरिकको स्वास्थ्य, सामाजिक र आर्थिक जीवनमा खडा भएको चुनौतीको सामना गर्दै सरकार अग्रसर भएको स्पष्ट गरेका छन् । उनले (कोभिड १९ )को संक्रमणबाट सुरक्षित हुने उपाय अवलम्बन गर्दे आ-आफ्ना स्थानमा रहेर दिवस मनाउन पनि सबैमा आह्वान गरेका छन् ।
