२८ वैशाख २०७७, काठमाडौं
सामाजिक सञ्जाल फेसबूकमा अश्लील भिडिओ राखेर आत्महत्या गर्न बाध्य बनाएको आरोपमा प्रहरीले एक युवकलाई नियन्त्रणमा लिएको छ ।
पक्राउ पर्नेमा कञ्चनपुरको बेलौरी नगरपालिका सातका २३ वर्षीय सन्तराम चौधरी रहेको प्रहरीले जानकारी दिएको छ । चौधरीले कैलालीको गौरीगंगा नगरपालिकाकी एक युवतीको म्यासेन्जरबाट उनका आफन्त तथा साथीहरुलाई अश्लील भिडिओ र तस्वीर पठाइ आत्महत्या गर्न बाध्य बनाएको प्रहरीको भनाइ छ ।
प्रेम सम्बन्ध खटपटिएपछि चौधरीले ती युवतीको फेसबूकमार्फत् नै अश्लील भिडिओ र तस्वीरहरु पठाएको पाइएको प्रहरीले जनाएको छ ।
अश्लील भिडिओ र तस्वीर आफन्तलाई पठाइएपछि मानसिक तनावमा रहेकी युवतीले कैलाली धनगढी उपमहानगरपालिका ६ को जालीस्थित सुकुटी नालामा झुण्डी आत्महत्या गरेकी थिइन् ।
चौधरीलाई उक्त अश्लील भिडिओ , तस्वीर, र फेसबूक आईडी लगईन अवस्थामा फेलापारी सो मोबाईल बरामद गरी अनुसन्धान शुरु गरिएको जिल्ला प्रहरी कार्यालय कैलालीले जनाएको छ ।
