०९ वैशाख २०७७, काठमाडौं
सत्तारूढ दल नेपाल क्युनिष्ट पार्टी (नेकपा)का वरिष्ठ नेता माधवकुमार नेपालले विषम परिस्थितिमा पार्टी एकतामा आघात पुग्ने गतिविधि कसैले नगर्न अपिल गरेका छन् ।
अहिले विकसित कतपिय घटनाक्रमले पार्टीभित्र अनेकौं आशंका र चिन्ता उत्पन्न भएको भन्दै उनले नेता कार्यकर्तालाई एकताप्रति संवेदनशील रहन, पार्टीलाई एकताबद्ध बनाइराख्न र आपसी हार्दिकता अभिवृद्धि गर्दै पार्टी काममा क्रियाशिल रहन आह्वान गरेका छन् ।
सरकार, पार्टी कहीँबाट पनि मूल जिम्मेवारीबाट ध्यान अन्यत्र मोड्ने, संविधान र कानूनी शासनका मान्यतामा प्रहार हुने, अविश्वास र आशंका उत्पन्न हुने तथा पार्टीको एकतामा आघात पुग्न सक्ने गतिविधि गर्न नहुने नेता नेपालले बताएका छन् ।
पूर्वप्रधानमन्त्रीसमेत रहेका नेता नेपालले आज दिउँसो एक विज्ञप्ति जारी गर्दै कोभिड १९ को संक्रमण रोकथाम र नियन्त्रणमा सरकार, आफ्नो पार्टीसहित अन्य पार्टीका नेता, कार्यकर्ता र जनताको ध्यान केन्द्रित हुनुपर्ने धारणा राखेका हुन् ।
नेता नेपालले पार्टीलाई विधिका आधारमा सहमति, समझदारी र विश्वासका साथ अघि बढाउने कुरामा आ(आफ्नो ठाउँबाट योगदान गर्न आग्रह गरेका छन् ।
सरकारले हिजो राजनीतिक दल विभाजन गर्न सक्ने अध्यादेश ल्याएपछि अहिले उक्त विषयले सत्तारूढ दल नेकपामा तरंग ल्याएको छ ।
