१४ फागुन २०७६ काठमाडौं
अनेरास्ववियू केन्द्रीय समितिको आयोजनामा जनयुद्धका प्रथम सहिद दिल बहादुर रम्तेलको २५ औं स्मृतिमा आयोजित दीप प्रज्वलन कार्यक्रम सम्पन्न भएको छ ।
माईतिघर मण्डलामा सम्पन्न भएको दीप प्रज्वलन कार्यक्रममा सम्बोदन गर्दै अनेरास्ववियूका संयोजक ऐन महर र सह–संयोजक रञ्जित तामाङले माओवादीलाई सघाएको आरोपमा चार कक्षामा अध्ययनरत रम्तेललाई विद्यालय हाताभित्रै सुरक्षाकर्मीले हत्या गरेको बताए । सहसंयोजक तामाङले आजभन्दा २५ वर्ष अगाडि गोरखाको पुन्द्रुङस्थित ब्रम्हाचारिणी निमाविको कक्षा चारमा अध्ययनरत रम्तेललाई तत्कालीन माओवादीले जनयुद्धको पहिलो शहिद घोषणा गरेको समेत बताए ।
शहिदकै बलिदानका कारणले आज संघीय लोकतान्त्रिक गणतन्त्र नेपाल संस्थागत भएको विद्यार्थी नेताहरुले बताएका थिए । शिक्षा, स्वास्थ्य, रोजगार लगायतका संविधान प्रदत्त मौलिकहकहरु नागरिकको जीवनमा लागु गराउन सक्नु नै शहिदहरुप्रतिको सम्मान भएको नेताहरुले बताए ।
