०४ फागुन २०७६, काठमाडौं
एक हतियारधारी समूहले अफ्रिकी मुलुक नाइजेरियामा ३० जनाको विभत्स हत्या गरेको छ।
देशको उत्तरपश्चिमी क्षेत्रमा पर्ने ग्रामीण क्षेत्रमा भएको हिंसात्मक घटनामा परी उनीहरुको मृत्यु भएको अधिकारीहरुले जनाएका छन्।
प्रहरी अधिकारीहरुले आइतबार (आज) दिएको जानकारी अनुसार मोटरसाइकलमा आएका दर्जनौं हरियारधारीहरुले गाउँलेहरुलाई अन्धाधुन्ध आक्रमण गरेका थिए।
उनीहरुले काट्सीना राज्यमा पर्ने साउवा र डाङकर गाउँमा बस्ने स्थानीय बासिन्दालाई शुक्रबार गोली प्रहार गरेर हत्या गरेको त्यहाँको प्रहरीले जनाएको छ। आक्रमणकारीहरुले स्थानीय बासिन्दालाई घर घरमै आक्रमण गर्नुका साथै उनीहरुको घरमा समेत आगजानी गरेका छन्।
‘हतियारधारी आक्रमणकारीहरुले साउवामा २१ जनाको हत्या गरेका छन् भने अरु ९ जनालाई डाङ्कर गाउँमा हत्या गरेका छन्।’ कात्सिनाका प्रहरी प्रवक्ता गाम्बो इसाहले भनेका छन्।
मृत्यु भएकामध्ये अधिकांश बृद्धबृद्धा र बालबालिका रहेका बताइएको छ। आक्रमणकारीहरुले आक्रमण गर्न थालेपछि भाग्न नसकेकाले मृत्यु हुनेमा बृद्धबृद्धा र बालबालिका धेरै भएको अधिकारीहरुले जनाएका छन्।
आक्रमणकारीहरुले मानव हत्या र घरहरुमा आगजनी गरेकाले घटना दर्दनाक देखिएको प्रहरीको भनाइ छ। स्थानीय एक बासिन्दाले भने, ‘यति दर्दनाक र क्रुर घटना मैले जीवनमा अहिलेसम्म देखेको थिइनँ।’
एजेन्सी
