०६ माघ २०७६, काठमाडौं
पत्रकार शालिकराम पुडासैनीको आत्महत्या दुरुत्साहन मुद्दामा लोकप्रिय सञ्चारकर्मी रवि लामिछानेसहित तीनै जनालाई चितवन जिल्ला अदालतले निर्दोष रहेको भन्दै सफाइ दिएको छ ।
पत्रकार पुडासैनीको गएको साउन २० गते भएको रहस्यमय निधन सम्बन्धमा साउन ३० गते छानबिनका लागि भन्दै प्रहरीले लामिछाने सहित युवराज कँडेल र अस्मिता कार्कीलाई नियन्त्रणमा लिएका थिए ।
दुवै पक्षको कानुन व्यवसायीको बहसपछि भदौं ९ मा चितवन जिल्ला अदालतको आदेशपछि रविले ५ लाख रुपैयाँ र युवराजले ३ लाख रुपैयाँ धरौटी बुझाएर रिहा भएका थिए । अस्मिता भने साधारण तारेखमा रिहा भएकी थिइन् ।
अभियोग पत्रमा उनीहरुविरुद्ध ५ वर्ष जेल सजाय र ५० हजार जरिवानाको माग गरिएको थियो । रिहा भए पनि जिल्ला अदालतले विदेश जान अनुमति लिनुपर्ने, पुडासैनी आत्महत्याबारे कार्यक्रममा छलफल तथा बहस चलाउन नपाउने र अदालतमा विचाराधीन विषयमा बोल्न नपाउने भन्दै बन्देज लगाएको थियो।
