जङ्गलमा तास खेल्दै गर्दा ५ पक्राउ, १५ फरार

०२ माघ २०७६, काठमाडौं

बनेपा नगरपालिका–९ मगरगाउँमाथिको जङ्गलमा तास खेलिरहेको अवस्थामा नगद र सवारी साधनसहित पाँच जनालाई प्रहरी कार्यालय बनेपाको टोलीले नियन्त्रणमा लिएको छ ।

बुधबार बेलुका जङ्गलमा लुकेर तास खेलिरहेको अवस्थामा पाँच जनालाई नियन्त्रणमा लिनुका साथै नगद रु एक लाख ६२ हजार २०, चार स्कुटर, ११ मोटरसाइकल, एउटा कार र ११ बुक तास बरामद गरिएको प्रहरी कार्यालय बनेपाका प्रमुख प्रहरी निरीक्षक योगेन्द्र तिमिल्सिनाले जानकारी दिएका छन् ।

फरार रहेका १५ जनाको खोजीकार्य जारी रहेको र दुई वटा चेकबुकसमेत बरामद भएको जानकारी दिएका छन् । पक्राउ परेकाहरुलाई तास, जुवा ऐनअन्तर्गत कारवाही हुने प्रहरीले जनाएको छ ।