१४ मंसिर २०७६, काठमाडौं
बूढानीलकण्ठ नगरपालिकाको नवनिर्मित भवन नगर स्थापना दिवसको अवसर पारेर मंसिर १६ गते नेपाल सरकारका उपप्रधान तथा रक्षामन्त्री ईश्वर पोखरेलद्वारा उद्घाटन हुने एक पत्रकार सम्मेलन गरी जानकारी गराईएको छ ।
बूनपा १० का वडाध्यक्ष तथा नगर प्रवक्ता नवराज भट्टराईका अनुसार १४ रोपनी क्षेत्रफलमा बनेको तीन तले नवनिर्मित भवनको लागत १० करोड ९ लाख ४३ हजार रहेको जानकारी दिदैं उद्घाटन समारोहमा स्थानीय संस्कृति झल्किने खालका विभिन्न झाँकी तथा नृत्यहरु प्रदर्शन हुनेछ ।
उद्घाटन समारोह भव्य र व्यवस्थित रुपमा सम्पन्न गर्न नगरपालिकाले पाँच व्यवस्थापन समिति बनाएको छ । जसमा बूनपा २ का वडाध्यक्षको संयोजकत्वमा कार्यक्रम व्यवस्थापन समिति, बूनपा १० का वडाध्यक्षको संयोजकत्वमा प्रचार–प्रसार समिति, बूनपा ८ का वडाध्यक्ष सुमन तमाङको संयोजकत्वमा अतिथि सत्कार तथा जलपान व्यवस्थापन समिति, बूनपा १३ का वडाध्यक्ष श्रीकृष्ण श्रेष्ठको संयोजकत्वमा साँस्कृतिक समिति, कार्यपालिका सदस्य संगम गहतराजको संयोजकत्वमा सवारी (पार्किङ्ग) व्यवस्थापन समिति बनाएको छ ।
कार्यक्रममा बूनपाका प्रमुख प्रशासकीय अधिकृत कुमार प्रसाद कोइरालाले वि.सं. २०७१ मा गठन भएका नगरपालिका मध्ये आफ्नै भवनमा सर्ने पहिलो नगर बूढानीलकण्ठ नगरपालिका भएकोमा खुशी व्यक्त गरे । विगतमा नगरका विभिन्न शाखाहरु भिन्न–भिन्न स्थानमा संचालन हुँदा नगरवासीलाई समस्या परेको बताउँदै अब भेटनरी बाहेकका सम्पूर्ण शाखाहरु एउटै भवनबाट संचालन गर्दा सेवामा सहजता हुने जानकारी गराए ।
कार्यक्रममा काठमाडौं निर्वाचन क्षेत्र नं. ४ र ५ का संघीय तथा प्रदेश स्तरीय सांसदहरूको उपस्थिति रहने तथा छिमेकी नगरपालिकाका प्रमुखहरुको समेत उपस्थित हुने जनाईएको छ ।
