१४ असोज २०७६, काठमाडौं
अन्तर्राष्ट्रिय जेष्ठ नागरिक दिवसको अवसरमा बूढानीलकण्ठ नगरपालिका वडा नं १० मा निःशुल्क स्वास्थ्य परीक्षण, दीर्घरोगी पहिचान तथा निःशुल्क दन्त शिविर कार्यक्रम सम्पन्न भएको छ ।
जेष्ठ नागरिक समाज बूनपा १० को संयोजनमा भएको कार्यक्रममा वडाध्यक्ष नवराज भट्टराई, वडा सदस्यहरु लगायत विभिन्न क्षेत्रमा कार्यरत वडावासीको उपस्थिती रहेको थियो ।
बूनपा १० का वडाध्यक्ष नवराज भट्टराईले स्वास्थ्य परीक्षण लगायतका सेवाहरु वडाले आगामी दिनमा पनि पुनः संचालन गर्दा वडावासी बुवाआमाहरुको स्वास्थ्यमा कम समस्या हुने बताए । साथै वृद्धवृद्धाहरुलाई वडा कार्यालयबाटै भत्ता वितरण गरिरहेको जानकारी समेत वडाध्यक्ष भट्टराईले दिएका छन् ।
निःशुल्क स्वास्थ्य परीक्षण कार्यक्रममा आज मंगलबार ६६ जना सेवाग्राहीले स्वास्थ्य परीक्षण तथा औषधी लिएको जानकारी शहरी स्वास्थ्य प्रवर्धन केन्द्र कपन जनस्वास्थ्य अधिकृत प्रतिमा खरेलले परिवर्तन खबरलाई दिएकी छिन् ।
वृद्धवृद्धाको स्वास्थ्य परीक्षण गर्दा उच्च रक्तचाप, सुगर, प्रेसर, दम, बाथ लगायतका रोगहरु देखा परेको जनस्वास्थ्य अधिकृत खरेलले बताईन् । खरेलले यस किसिमका रोग न्यूनिकरण गर्न मर्निङ वाक (विहान हिड्ने), योगा गर्ने र शारिरिक कसरतका कामहरु गर्नु उपयुक्त हुने बताए ।
त्यसैगरि दन्त परीक्षण कान्तिपुर डेण्टल एण्ड जेनेरल हस्पिटल बसुन्धाराको सहयोगमा भएको थियो । २८ जना दाँत चेकगर्ने मध्ये सबैजसो वृद्धवृद्धाको दाँत नयाँ राष्नुपर्ने, दाँत किराले खाएका कारण उखेल्नु पर्ने लागायतका समस्या देखा परेको हस्पिटलका म्यानेजर शैलेस कुमार पण्डीतले बताए ।
