२९ भदौ २०७६, काठमाडौं
राष्ट्रिय बाल दिवस २०७६ को अवसरमा टोखा नगरपालिकाले जनप्रतिनिधिसँग बालबालिकाहरुको अन्तरक्रिया तथा पुरस्कार वितरण कार्यक्रम सम्पन्न गरेको छ ।
टोखा नगरपालिकाका प्रमुख प्रकाश अधिकारीले आफूले नेतृत्व सम्हालेपछि टोखा नगरपालिका भित्रका बालबालिकाहरुको लागि विभिन्न कार्यक्रम आयोजना गरेको जनाउँदै बालबालिकाहरुकै सल्लाह सुझाव अनुसार नगरपालिका अगाडि बढ्ने प्रतिबद्धता ब्यक्त गरे ।
उपप्रमुख तथा कार्यक्रमको सभाध्यक्ष ज्ञानमाया डंगोलले नगरपालिकाले ४५ विद्यालयमा बाल क्लब गठन गरिसकेको र ८ वटा वडामा बाल संजाल पुर्नगठन भईसकेको जानकारी दिईन् ।
आफू निर्वाचित भएपछि किशोरीहरुलाई आत्मरक्षा तालिम, सबै विद्यार्थीहरुलाई जीवनोपयोगी तालिम, उद्घोषण तालिम प्रदान गरेको बताउँदै बाल अधिकारकर्मीहरुले माग गरे बमोजिम सबै सामुदायिक विद्यालयका विद्यार्थीहरुलाई पोषणयुक्त खाजा र छात्राहरुलाई सेनेटरी प्याडको ब्यवस्था तत्काल नगरपालिकाले गर्ने जानकारी दिईन् ।
एक वडा एक पार्कको अवधारणा बालबालिका लक्षित भएकोले बालमैत्री नगरपालिका घोषणा गर्ने आधार तयार गर्न यही बर्षदेखि बालमैत्री वडा घोषणा गर्दै अगाडि बढ्ने जानकारी दिईन् ।
कार्यक्रममा नगरस्तरीय बाल क्लब संजालकी सदस्य बबिता परियारले टोखा नगरपालिकाका बालबालिकाहरुको लागि जनप्रतिनिधि आएपछि धेरै राम्रो सहयोग गरेको अनुभव समेत सुनाईन् ।
त्यसैगरी प्रियान्स ठाकुरले अहिलेका विद्यार्थीहरुको सपना चाही शिखर छुने हुने तर संस्कृति बिर्सिएको अनुभव सुनाउँदै सामाजिक संजालको दुरुपयोग स्वरुप केटीहरु ‘टिकटक’ र केटाहरु ‘पबजी’ मा भुलिएको अनुभव सुनाए ।
टोखा वडा नं. ५ बाल क्लबकी अध्यक्ष ईशा गुरुङले हामी विद्यार्थीहरुमा अनुशासनहिनता, आदर सत्कार गर्ने बानी भुल्दै गएको बताउँदै त्यसलाई सुधार्न आफैं बदलिनुपर्ने धारणा राखिन् । विद्यालयको ट्वाईलेटको कुनाकुनामा डस्टबिन नभएको कारण किशोरीहरुका प्याडहरुले दुर्गन्ध बनाएको बताउँदै विद्यालयको ट्वाइलेटहरुमा डस्टबिनको व्यवस्था गर्न माग गरिन् ।
टोखा ७ की स्वस्तिका श्रेष्ठले बिद्यार्थीहरुले अधिकारको कुरा गरेर कर्तव्य भूलिरहेको बताउँदै नगरपालिकामा ब्यवस्थित सार्वजनिक पुस्तकालय स्थापना गर्न माग गरिन् ।
टोखा १ की श्रेया अधिकारीले बालबालिकाको क्षेत्रमा छुट्याएको बजेट बालबालिकाकै क्षेत्रमा लगानी गर्न अनुरोध गर्दै बालबालिकालाई क्षमता विकास तालिम दिन माग गरिन् ।
टोखा २ का सन्देश रसाईलीले वडा नं. १ देखि माथिको रोड असार १५ मा रोपाई गर्न ठिक भएको जस्तो बताउँदै तत्काल निर्माण गर्न माग गरिन् ।
टोखा ३ का पर्शुराम अधिकारीले बालक्लब बनाएपछि बालबालिकाहरुले त्यसबारे नबुझेर क्लबहरु गतिशिल नभएको गुनासो गरे । नगरपालिकाले सार्वजनिक शौचालय र अभिभावकहरुलाई तालिम दिनुपर्ने पनि उनको माग थियो ।
वडा नं. ४ का विशाल पण्डितले संचार माध्यमले बालबालिकाका मुद्दाहरुमा प्रकाशन/प्रशारण गरी सचेतना फैलाउनुपर्ने माग गरे । स्कूलमा अहिलेपनि बालबालिकाहरुलाई भौतिक यातना दिने काम भईरहेको बताउँदै त्यसलाई रोक्न माग गरे ।
वडा नं. ५ का अबिरल नेपालले नगरले छुट्याएको बालबालिकाको बजेट कागजमा मात्र सिमित भएको बताउँदै त्यसलाई कार्यान्वयन गर्न माग गरे ।
वडा नं. ९ की समिक्षा महर्जनले विद्यालयको छेउछाउमा संचालित होटलहरुमा मादक पदार्थ पिएर लागूपदार्थ सेवन गरेर विद्यालयबाट घर फर्कने बालबालिकालाई दुर्व्यबहार भईरहेको बताउँदै त्यसलाई समाधान गर्न अनुरोध गरिन् ।
वडा नं. १० की प्रबिधि खनालले विद्यालयमा खानेकुरा र सेनेटरी प्याडको आवश्यकता रहेको बताउँदै त्यसलाई ब्यवस्था गरिदिन माग गरिन् । वडाको सिफारिसमा दिईने छात्रवृत्ति पनि गरिबलाई होइन आफ्नो मान्छेलाई दिएको बताउँदै तत्काल त्यसलाई रोक्नुपर्ने माग गरिन् । उनले समाजमा किशोरीहरु सुरक्षित नभएको बताउँदै बाटोको ठाउँठाउँमा डस्टबिनको व्यवस्था गर्न माग गरिन् ।
वडा नं. १० की सरस्वती तामाङले विद्यालयमा क्यान्टिनको व्यवस्था नभएको गुनासो गर्दै छात्रवृत्ति जान्नेलाई मात्र होइन जान्न चाहनेहरुको लागि पनि वितरण गर्न माग गरिन् ।
वडा नं. १० कै अन्जन थापा मगरले विद्यालयमा खेलकुदको वातावरण नभएकोले त्यसतर्फ सोच्न अनुरोध गरे ।
वडा नं. ११ का सुजल पाण्डेले नगरस्तरीय बाल क्लबको कार्यालय र लेटर प्याड व्यवस्था गर्न माग गर्दै टोखा देखि माथिको बाटो तत्काल पिच गर्न माग गरे ।
वडा नं. ७ की फुलम्बु शेर्पाले गरिब र धनी परिवारबाट आएका साथीहरुमा विभेदको व्यवहार भएको बताउँदै त्यसलाई कम गर्न कार्यक्रम संचालन गर्नुपर्ने बताईन् ।
कार्यक्रममा विद्यार्थीहरु सुनिता श्रेष्ठ, सीता सुवेदी र शिक्षक प्रतिनिधि टंक चापागाई शिक्षा शाखा प्रमुख बाबुराम गौतमले आफ्नो धारणा राखेका थिए । कार्यक्रममा नगरस्तरीय चित्रकला प्रतियोगितामा प्रथम हुने श्याम मुडवरीलाई तीन हजार नगदसहित शिल्ड र प्रमाणपत्र, द्वितीय हुने आनन्द पण्डितलाई पच्चिस सय नगद सहित शिल्ड र प्रमाणपत्र, तृतीय हुने प्रिन्स शाहलाई दुई हजार नगद र प्रमाण पत्र, सान्त्वना हुने सिम्रन राईलाई पन्ध्र सय नगद सहित शिल्ड र प्रमाण पत्र वितरण गरिएको थियो ।
यसैगरी कक्षा ६ देखि ८ सम्मको बक्तृत्वकलामा प्रथम हुने सुमन तामाङ, द्वितीय हुने दिया श्रेष्ठ, तृतीय हुने अनिशा भट्टराई र सान्तवना हुने श्रेया अधिकारीलाई प्रमाणपत्र र शिल्ड वितरण गरिएको थियो ।
कक्षा ९ देखि १२ को ‘म टोखा नगरको मेयर भए भने’ भन्ने विषयक बक्तृत्वकला कार्यक्रममा प्रथम हुने प्रियान्स ठाकुर, द्वितीय हुने प्रतिमा तामाङ, तृतीय हुने फु ल्हमु शेर्पालाई सम्मान पत्र र शिल्ड प्रदान गरिएको थियो ।
कार्यक्रममा नगर कार्यपालिका सदस्य कल्पना घिमिरेले शहिदको विषयमा लेखन र बाचन गरेको कबिताले सबैलाई भावुक बनाएको थियो । कार्यक्रममा अधिकारकर्मी बिना शर्माले राष्ट्रिय बाल दिवसको सन्दर्भमा बालबालिकाको अवस्था बिषयक कार्यपत्र समेत प्रस्तुत गरेकी थिईन् ।
